+21 °С
Болотло
Йәмғиәт
30 Ғинуар 2021, 15:55
Мәғәнәһеҙ һәм зыянлы башланғыс!
Радий Хәбиров студенттарҙы митингтарҙа ҡатнашҡаны өсөн уҡыу йортонан ҡыуыуға ҡырҡа ҡаршы.
Бөгөн Башҡортостан Башлығы Радий Хәбиров журналистар менән аралашҡан саҡта кисә ишетелеп ҡалған мәғлүмәт буйынса үҙ фекерен белдерҙе. Унда, имеш властар рөхсәт итмәгән митингтарҙа ҡатнашҡан студенттарҙы уҡыу йорттарынан ҡыуасаҡтар, ә мәктәп уҡыусыларының йыллыҡ баһаларын кәметәсәктәр тигән закон проекты әҙерләнеүе тураһында һүҙ бара ине. Идеяның авторы - Дәүләт Йыйылышы – Ҡоролтай депутаттарының береһе.
– Мин быға ҡырҡа ҡаршымын. Бөтөнләй кәрәкмәгән һәм артыҡ башланғыс. Бындай ҡарар ҡайҙан килеп сыҡҡандыр, белмәйем. Тик мин был турала ишетеп ҡалғас та, үтә асыуландым, – тине Радий Хәбиров. – Был башланғыс мәғәнәһеҙ генә түгел, ә зыянлы ла. Әлбиттә, ул үтмәйәсәк һәм хатта Дәүләт Йыйылышы – Ҡоролтай депутаттарына ҡарауға ла сығарылмаясаҡ. Беҙ инициаторҙарҙан был процесты туҡтатыуҙы һораясаҡбыҙ. Быны эшләү кәрәкмәй. Беҙ бит мәмерйә быуатында йәшәмәйбеҙ. Кешенең фекере, ҡарашы өсөн ошондай юл менән яза биреү - ярамаған ғәмәл.
Радий Хәбиров белдереүенсә, республика властары йәштәр менән әүҙемерәк эшләргә тейеш.
– Әлбиттә, студент йәки мәктәп уҡыусыһы янына барып: “һин унда барма, беҙ һиңә бының өсөн яза бирәсәкбеҙ” тип әйтеүе еңелерәк. Был мәсьәләне хәл итеүҙең примитив, ҡырағай юлы, – тине Радий Хәбиров. – Иң аҡыллыһы һәм шул уҡ ваҡытта ауыры, уларға нимә эшләргә кәрәк, ә нимә кәрәкмәй икәнлеген аңлатыу. Уның менән аралашырға, бәхәсләшергә кәрәк. Уға: “Әйҙә, бергә хәл итәйек, беҙгә бында йәшәргә, үҫешергә һәм алға табан барырға кәрәк”, тип әйтергә кәрәк. Беҙҙең студенттар бик аҡыллы һәм барыһын да аңлай. Уҡыусыларыбыҙ ҙа шундай – аҡыллы һәм үҫкәндәр. Шуға күрә был мәсьәләлә минең ҡараш аңлайышлы.
Фото: Башҡортостан Башлығы сайты.
