Өс быуын ир-ат ярышты

Учалы филармонияһының спорт залында “Йәгеҙ әле, егеттәр!” хәрби-спорт фестивале уҙғарылды. Ватан һаҡсылары көнөнә арналған сарала ир-егеттәрҙең өс быуыны – олатайҙар, атайҙар, улдар көс һынашты.

Бишәр ғаиләнән торған ике команда арҡан тартыуҙа, автоматты һүтеп-йыйыуҙа, “Мин - патриот” викторинаһында, спорт эстафетаһында ярышты.

Улдарын, атайҙарын, олатайҙарын, ағайҙарын, ҡустыларын дәртләндерергә ҡатын-ҡыҙҙар, балалар ҙа күп йыйылды. Шуға күрә фестиваль ысын мәғәнәһендә ғаилә байрамына әйләнде. Бар ҡатнашыусылар ҙа грамоталар, миҙалдар, иҫтәлекле бүләктәр менән дәртләндерелде.

Әлбиттә, ярышта еңелеүсе булманы, барыһы ла яҡшы кәйеф, дәрт-илһам алып таралышты.

Фото: Учалы районы хакимиәте сайтынан.