Контроль-касса техникаһын ҡулланалармы?

Мәғлүм булыуынса, ошо көндәрҙә республика Башлығы Радий Хәбировтың күрһәтмәһе буйынса транспортта рейдтар башланғайны. Уларҙа Транспорт һәм юл хужалығы министрлығы, Федераль һалым хеҙмәте идаралығы, ЮХХДИ һәм Төбәк-ара дәүләт автомобиль юлын күҙәтеү идаралығы хеҙмәткәрҙәре ҡатнаша. Рейд барышында 20-ләп транспорт сараһы тикшерелде.

Тикшереү уҙғарылған тәүге ике көн эсендә йәмәғәт транспортында пассажирҙар ташыу менән шөғөлләнгән өс ойошмаға ҡарата Рәсәй ҡануниәтен боҙған өсөн бер нисә административ эш ҡуҙғатылды. Улар һалым органдарынан контроль-касса техникаһын ҡулланыуға ҡағыла.

Һәр ташыусы менән ҡулаҡса менән иҫәпләшкәндә контроль-касса техникаһын мотлаҡ ҡулланыу кәрәклеге тураһында аңлатыу эше үткәрелде. Уларға шулай уҡ ошо өлкәләге закон талаптарын боҙған өсөн яҙа биреләсәге хаҡында ла иҫкәрттеләр. Мәҫәлән, юл хаҡын түләгәндә контроль-касса техникаһын ҡулланмаған өсөн вазифалы кешеләргә – табыштың сирек өлөшөнән яртыһына тиклем (кәмендә 10 мең һум), ойошмаларға иһә дүрттән өс өлөшөнән алып табыштың тулы күләменә тиклем (кәмендә 30 мең һум) штраф һалына. Тәртипте ҡабатлап боҙһалар, вазифалы кешеләр бер-ике йылға был эшмәкәрлектән ситләтелә, ә шәхси эшҡыуарҙарҙың һәм ойошмаларҙың эшмәкәрлеге 90 тәүлеккә туҡтатыла.

Рейдтар ыңғай һөҙөмтә бирә – йәмәғәт транспорты ойошмалары пассажирҙар менән иҫәпләшкәндә ККТ-ны әүҙемерәк ҡуллана башланы. Транспорт һәм юл хужалығы министрлығы граждандарҙың ошо өлкәләге етешһеҙлектәргә ҡағылған мөрәжәғәттәрен ҡарарға әҙер. Уларҙы https://letters.bashkortostan.ru/request/ электрон ҡабул итеү бүлегенә ебәрергә мөмкин.

Фото: pravitelstvorb.ru