Бәхет сере

Тапшырыу барышында саҡырылған ҡунаҡтар ҙа, әҙерләнгән сюжеттар ҙа ҡатын-ҡыҙ бәхетенең сере нимәлә тигән һорауға яуап эҙләне. Был юлы эксперттар булараҡ табиптар, психологтар, башҡа белгестәрҙән тыш, билдәле шәхестәр саҡырылды. “Баш­информ” агентлығының баш мөхәррире Рус­лан Шәрәфетдинов, Башҡортостандың Баш дәүләт автоинспекторы Динар Ғилметдинов, билдәле блогер, десантсы һәм спортсы Рөстәм Нәбиев, психолог Асҡар Ислам ҡатын-ҡыҙҙы бәхетлерәк итеү, йәшәйешен еңеләйтеү тураһында фекер алышты. Алып барыусылар Альбина Ҡасимханова менән Дмитрий Каретконың һорауҙарына ихлас яуап биргән ҡунаҡтар тормоштарында иң ҡәҙерле ҡатын-ҡыҙҙың әсәй икәнлеген билдәләп үтте.

БЮТ хәбәрселәре байрам алдынан Милли архив идаралығы фондына мөрәжәғәт итеп, Башҡортостан тарихына алтын хәрефтәр менән яҙылған ҡатын-ҡыҙҙар тураһында ҡыҙыҡлы сюжет әҙерләгән. Мәҫәлән, Башҡорт АССР-ның халыҡ яҙыусыһы Зәйнәб Биишева хаҡында архивтан табылға видеояҙма айырыуса күңелгә ҡәҙерле булды.

“Ҡатын-ҡыҙ бәхете биләмәһе” асыҡ академияһының ойоштороусыһы һәм авторы – Каринэ Хәбирова был юлы ҡоймаҡ ҡойоу серҙәре менән уртаҡлашты. Ҡоймаҡ – ул милли аш-һыу ғына түгел, күпселек халыҡтарҙа ҡояш символы, ғаиләне бергә туплаған табын йәме. Һәр хужабикәнең үҙенең генә ҡоймаҡ бешереү сере бар. Каринэ Хабирова үткәргән оҫталыҡ дәресе күптәрҙең күңеленә хуш килгәндер.

“Ҡатын-ҡыҙ бәхете биләмәһе” быға тиклем Саҡмағош районына табиптарҙан, белгестәрҙән торған десант ебәргәйне. Тамашасыларға ошо саранан репортаж, Ҡыйғы районы хакимиәте башлығы Зөһрә Гордиенко, райондың эшҡыуар-ҡатын-ҡыҙҙары тураһында сюжеттар күрһәтте.

Тапшырыуҙың һуңғы өлөшө иң ҡыҙығы булғандыр. Студияла Башҡортостандың һәм Татарстандың халыҡ артисы Салауат Фәтхетдинов менән Башҡортостандың атҡаҙанған артисы Радик Юлъяҡшин осрашты. Артистар ҡатын-ҡыҙҙарҙы 8 Март байрамы менән ҡотланы, үҙҙәренең яҡындары өсөн әҙерләгән бүләктәре тураһында һөйләне.

Фото: "Башинформ" МА