Айыҡ байрамдарҙан – сәләмәт тормошҡа!

Ауылда мәктәп, мәҙәниәт йорто, балалар баҡсаһы, мәсет, фельдшер-акушерлыҡ пункты, өс магазин эшләп килә. Бөгөн бындағы 126 йорт­та 440 кеше йәшәй.

“Үҙ көстәре менән донъя көткән, лайыҡлы балалар үҫтергән һоҡлан­ғыс парҙар йәшәй беҙҙең ауылда. 2020 йылдың авгусында ауыл хакимиәте башлығы һәм район хакимиәте вәкилдәре менән ос­рашыуҙа брәтәктәр бер тауыштан “Айыҡ ауыл” конкурсында ҡатна­шырға теләк белдерҙе, ойоштороу комитеты төҙөлдө, пландар ҡабул ителде. Сәләмәт тормош рәүешен әйҙәү буйынса күп эштәр башҡа­рылды”, – тип һөйләй ауыл ста­ростаһы Фәнзил Йәғәфәров.

Ауылдаштарының исемдәрен мәңгеләш­тереү маҡсатында обелиск төҙөлгән, аллея булдырылған. Ауыл зыяраты кәртәһе тулыһынса яңыртылған. Баҡса тултырып йә­шелсә, емеш-еләк, күҙҙең яуын алырлыҡ сәскә үҫтергән ауылдаштар “Йәрминкә”, “Сәскәләр”, “Уңыш байрамы”нда әүҙем ҡатнаша. Үҙеш­мәкәр йырсылар, сәхнә оҫталары бихисап. Үҫеп килгән быуын өсөн дә төрлө түңәрәктәр эшләп килә.

Йәш быуынды тәрбиәләү йәһә­тенән район һәм ауыл хакимиәте, ағинәйҙәр, ҡатын-ҡыҙҙар советы, атайҙар ҡоро ойошма­ларының сәләмәт тормошто пропаганда­лауҙа ролдәре бик ҙур.

Урындарҙағы башланғыстарҙы яҡлау программаһына ярашлы конкурстарҙа ла әүҙем ҡатнаша ауыл халҡы. 2015 йылда ошо программа буйынса өр-яңы мәҙәниәт йорто төҙөлһә, 2017 йылда урамдар яҡтыртылған. “Йәшел Рәсәй”, “Йәшел Башҡортостан”, “Тәбиғәтте һаҡлау – үҙ-үҙебеҙҙе яҡлау” акциялары, экологик өмәләр даими үтеп тора.

Брәтәктә спиртлы эсемлек менән мауыҡҡандар бармаҡ менән генә һанарлыҡ. Конкурста ҡатна­шып, сәләмәт тормошто пропаган­далауҙың һөҙөмтәһе булыр тип ышана улар.

“Йәмәғәт ойошмаларының ултырышында имен булмаған ғаи­ләләр менән профилактик эште камиллаштырыу мәсьәләләре ҡаралып, участковый, райондың “Ғаилә” үҙәге хеҙмәткәрҙәре менән берлектә рейдтар ойошторолдо. Ауыл халҡы район, республика, илдең мәҙәни тормошонда дәррәү ҡатнаша. Сәләмәт тормошҡа саҡы­рып 15 семинар, лекция, әңгәмәләр үткәрелде. Айыҡ йәшәү рәүешен пропагандалаған саралар Брәтәк ауылы эсендә генә түгел, дөйөм район күләмендә лә алып барыла”, – ти Бөрйән районы советы секретары Хәнифә Вәлиева.

Ауыл мәҙәниәт йортонда район кимәлендә шашка ярышы, “Мәсем” клубы педагогтары тарафынан “Беҙ сәләмәт тормош яҡлы” тип аталған осрашыуҙар, “Сәләмәт тәндә – сәләмәт рух” байрамы ойошторолған.