+21 °С
Болотло
Йәмғиәт
13 Апрель 2021, 15:00
Мәсәғүт ауылын һыу баҫты
Башҡортостан Башлығы Радий Хәбиров - Дыуанда. Хәбәр ителеүенсә, Мәсәғүттә 218 кеше, шул иҫәптән 71 бала йәшәгән 65 йортто һәм ихата биләмәләрен һыу баҫҡан.
13 апрелдә Башҡортостан Башлығы Радий Хәбиров Дыуан районына барҙы. Көндөҙгө 12.00 сәғәткә мәғлүмәттәр буйынса, Мәсәғүттә 218 кеше, шул иҫәптән 71 бала йәшәгән 65 йортто һәм ихата биләмәләрен һыу баҫты.
Хөкүмәт вице-премьеры, республиканың ташҡынға ҡаршы комиссияһы рәйесе Ирек Сәғитов белдереүенсә, Рәсәй Ғәҙәттән тыш хәлдәр министрлығының Башҡортостан буйынса Баш идаралығы урындағы халыҡты был хәл тураһында иҫкәрткән. Ҡотҡарыусылар кешеләрҙе һыу баҫҡан урындарҙан алып сыҡҡан, уларға ярҙам саралары күрһәтелгән.
Радий Хәбиров урында оператив штаб кәңәшмәһе уҙғарҙы һәм республика Хөкүмәтенә, Ғәҙәттән тыш хәлдәр буйынса дәүләт комитетына, район хакимиәтенә ҡаза күргәндәргә һәр яҡлап булышлыҡ ҡылырға, тергеҙеү эштәрен тиҙ арала үткәрергә ҡушты.
Был хәл тураһында Радий Фәрит улы шәхси сәхифәһендә лә яҙҙы:
"Республикала яҙғы ташҡын менән хәл ҡатмарлы. Ғәҙәттән тыш хәлдәр буйынса бар хеҙмәттәр тулы әҙерлектә һәм халыҡҡа ярҙам күрһәтә. Бөгөн Дыуан районында айырыуса ҡатмарлы хәл булды. Кисә, 12 апрелдә, Әй йылғаһында тығылған боҙҙо механик ысул менән ҡуҙғаттылар. Был мәсьәлә яйға һалынғас, өҫтәрәк икенсе тығын барлыҡҡа килде. Алкин хәрби часынан хәрбиҙәрҙе саҡырттыҡ. Әммә боҙ үҙе ҡуҙғалды.
Хәҙер иһә икенсе проблема. Мәсәғүттә 218 кеше, шул иҫәптән 71 бала йәшәгән 160 йортто һәм ихатаны һыу баҫты. Урындағы спорт мәктәбендә халыҡты ваҡытлыса ҡабул итеү пункты булдырылды. Йылға аръяғы һәм Совет урамдарында электр энергияһын һүндерергә тура килде. Газһыҙ өйҙәр ҙә бар. Хәҙер төп бурысыбыҙ - кешеләргә ярҙам итеү. Уларға ашарға аҙыҡ, эсергә һыу алып килеү. Кискә мөмкин булған урындарҙа ут һәм газ бирелер. Өйҙәрҙән һәм ихаталарҙан һыуҙы һурҙырасаҡбыҙ. Был эшкә дыуандарҙың үҙ көсө генә етмәй, Өфөнән дә машиналар һоранылар.
Дыуан районы хакимиәтендә штаб эшләй, Берҙәм дежур диспетчер хеҙмәте халыҡ менән бәйләнештә, 8-(347)-983-44-96. Һәр урамда "ҡыҙыу линия" булдырылған, телефондар скринда.
Әле хәрбиҙәр һауанан Дыуан районын ҡараны, Әйҙә боҙ тығылған ике ҙур урынды билдәләне. Эшләйбеҙ".
Фото һәм видео: vk.com/radiyhabirov
