“Рәсәй лидерҙары” конкурсында теркәлеү тамамлана

26 апрелдә ЛидерыРоссии.рф сайтында “Рәсәй – мөмкинлектәр иле” президент платформаһында конкурста ҡатнашыусыларҙы теркәү тамамлана. Конкурста ҡатнашырға теләк белдереүселәргә анкета тултырырға һәм видеоинтервью беркетеп ебәрергә кәрәк.

Ил Президенты Валдимир Путин башланғысы менән ойошторолған конкурс дүртенсе тапҡыр үткәрелә. “Фән”, “Һаулыҡ һаҡлау”, “Бизнес һәм сәнәғәт”, “Дәүләт идаралығы”, “Мәҙәниәт”, “Информация технологиялары”, “Студенттар” һәм “Халыҡ-ара мөнәсәбәттәр” өлкәләре буйынса һынау тотасаҡтар. Конкурста теркәлеү өсөн төрлө һынауҙарҙы үтергә кәрәк.

Дүртенсе конкурста еңеүселәргә артабан һөнәри яҡтан камиллашыу өсөн бер миллион һум аҡса бирәсәктәр. Сара ваҡытында ҡатнашыусылар менән йөҙҙән ашыу илдә билдәле лидерҙар эшләйәсәк. Улар араһында сәйәсмәндәр, мәҙәниәт эшмәкәрҙәре, ғалимдар, табиптар, министрлыҡ белгестәре бар.

Өс йыл дауамында үткәрелеп килгән конкурста ҡатнашыуға 660 106 ғариза бирелгән, сарала Рәсәй төбәктәренән дә, донъяның 68 иленән дә вәкилдәр ҡатнашҡан. Конкурстың финалына 900 кеше сыҡҡан, 313 кеше еңеүсе тип иғлан ителгән. Еңеүселәр араһынан 270 кеше дәүләт һәм бизнес структураларында эшләй.

Фото: hrlider.ru