Киләсәгебеҙ генә түгел, бөгөнгөбөҙ ҙә улар

Ғафури районында 14 йәштән 30 йәш­кә тиклемге 5 мең ҡыҙ һәм егет йәшәй. Урындағы район хакимиәтенең төп маҡсаты – уларҙың тормошта үҙен табырға ярҙам итеү, ҡыҙҙарҙың һәм егет­тәрҙең социаль әүҙемлеген арттырыу, һәләттәрен асыу һәм уны бойомға ашырырға ынтылыуына өлгәшеү, йәштәр мөхитендә енәйәтселек, наркоманлыҡ кеүек насар күренештәрҙе иҫкәртеү, булдырмау.

Ғафури районы хакимиәтенең йәштәр сәйәсәте буйынса секторы тарафынан былтыр төрлө йүнә­лештәге 100-гә яҡын сара ойош­торолған. Был, 2019 йыл ме­нән сағыштырғанда, 40 процентҡа кә­мерәк. Быға, әлбиттә, пандемия менән бәйле сикләүҙәрҙең инде­релеүе сәбәпсе. Шулай итеп, район­да Шаяндар һәм от­ҡорҙар клубының “Балалыҡтың хәүефһеҙ юлы” республика конкурсы үт­кәрелде. Унда Н.А. Мәжитов исемендәге Красноусол башҡорт гимназия-интернатының “Ауыр бала саҡ” командаһы III урын яуланы. Бынан тыш, тағы “Һәләтле балалар” бәйгеһе, “Саф ел” йәштәр форумы һәм башҡа саралар ойошторолдо. “Йәшә, урман!”, “Йәшел Башҡортостан-2020” акциялары, “Планетаны ҡотҡар” экологик челленджы һәм муниципаль берәмектә экологик хәлде яҡшыртыу буйынса шәмбеләр ойошторола.

– Онлайн сараларҙы йыш үткә­реү уларҙа ҡатнашыусылар һанын арт­тырыуға килтерҙе. Был, әлбиттә, сәләмәт тормош алып барыу өсөн үткәрелгән һәм Балаларҙы яҡлау, Йәштәр, Республика көндәренә арналған район сараларында балалар, үҫмерҙәр әүҙем ҡат­нашты. Ошондай спорт һәм башҡа сара­ларҙа алкоголизмға, наркоманияға ҡар­шы акциялар һәм “Чемпион менән зарядка” онлайн флешмобы үткәрелде, – тип белдерҙе Ғафури районы хакимиәте Социаль һәм йәштәр сәйәсәте бүлегенең йәштәр сәйәсәте секторы етәксеһе Ансаф Кәримов.

Шуныһы мөһим: йыл әйләнәһенә ирекмәндәр рәте лә тулыланған: 15 сарала барлығы 4 меңдән ашыу ирекмән ҡатнашҡан.

Әйткәндәй, былтыр 5 мең тирәһе кеше ҡатнашҡан иҫкәртеү саралары үткәрелгән. Уларҙа агитбригадалар ҡатнашҡан һәм наркомания, алкоголизм, тәмәке тартыу кеүек кире күренештәрҙе иҫкәртеү, булдырмау өсөн “Хатта яҡын барма” конкурсы ойошторолған. Йәнә Бөтә Рәсәй “Белергә тейеш” акцияһы, “Дәүләт, йәмғиәт һәм диндәрҙең халыҡты эскелеккә ҡаршы көрәш эшмәкәрлеге” “түңәрәк өҫтәл”е, “Витаминды никотинға алмашты­ра­быҙ!” акциялары һәм башҡа саралар яҡшы һөҙөмтәләр килтерер, тигән өмөттәбеҙ.

Имен булмаған, аҙ тәьмин ителгән ғаи­ләләрҙән район эске эштәр бүлек­сәһендә иҫәптә торған бәлиғ булмаған үҫмерҙәр, йәмғеһе 186 кешене эшкә урынлаштырыу планлаштырылған. Был йәйге мәшғүллекте тәьмин итеү өсөн 308393,00 һум аҡса бүленгән. Тик, коронавирус инфекцияһы сәбәпле, балалар ялы кисектерелгән.

Бәлиғ булмағандар араһында алкоголизмды, наркоманияны һәм токсикоманияны иҫкәртеү эше Ғафури районы хакимиәтенең социаль һәм йәштәр сәйә­сәте, Физик культура һәм спорт бүлек­тәре, балалар һәм йәштәр ижтимағи берекмәләре менән берлектә атҡарыла. Был юҫыҡта тағы “Бер­ҙәм Рәсәй”ҙең Йәш гвардияһы” Бөтә Рәсәй ижтимағи ойошма­һының Башҡортостан төбәк бүлек­сәһенең урындағы әүҙемселәре, “Алтын бал ҡорто” район балалар ижтимағи ойошмаһы, “Юнармия” Бөтә Рәсәй балалар һәм үҫмерҙәр хәрби-илһөйәрлек хәрәкәтенең Ғафури районы буйынса ойош­маһы, Ғафури районының йәштәр яҡташтар ойошмаһы ағзалары һәм башҡалар, сәләмәт тормош алып барыуға өндәп, рейдтар, төрлө акцияларҙы даими үткәрә.

Быйыл иһә йәштәрҙә илһөйәр­лекте тәрбиәләү йәһәтенән 40-тан ашыу сара ойошторолған, “Гайд парк” һәм “Саф ел” тип исемләнгән ике форум булған.

Күптән түгел “Хәтер вахтаһы” старт алды: Ғафури районының йәш эҙләнеүселәре беренсе экспе­дицияға юлланды. Район ДОСААФ-ы бүлексәһе эргәһендә барлыҡҡа килгән “Десант” эҙләү отрядының дүрт егете Василий Калачигов һәм Олег Николаев етәкселегендә беренсе тапҡыр эҙләү экспедиция­һына Ленинград өлкәһенә сәфәргә сыҡты. Бөтә Рәсәйҙә старт алған “Хәтер вахтаһы” акцияһында уларға Бөйөк Ватан һуғышы йылдарында ҡаты алыштар барған Воронов тигән урында ҡаҙып эҙлә­неүҙәр алып барасаҡ. Улар тыуған яҡтарына 5 майҙа ғына ҡайтасаҡ.