Был байрамдың тарихы бай

Был көндөң тарихи башланғысы 1886 йылға барып тоташа. Америка Ҡушма Штаттарының Чикаго ҡала­һында эшселәр хеҙмәт сәғәттәрен кәметеүҙе талап итеп, демонстрацияға сыға. Һуңынан йыл һайын ошо көндә эшселәр йыйыла башлай. 1889 йылда Парижда уҙғарылған II Интернационал конгреста 1 май Бөтә донъя эшсе­ләренең теләктәшлек көнө тип иғлан ителә. Беҙҙең илдә иһә, Совет власы ойошторолғас, был көн рәсми бил­дәләнә башлай.

Бөгөн дә был байрам төп мәғәнәһен юғалтмаған, сөнки хеҙмәт беҙҙе – төрлө ҡараш һәм быуын кешеләрен берләштерә. Эшһөйәрлек йәм­ғиәтте үҫтереүгә, ҡуйылған маҡсат­тарға уңышлы өлгәшеүгә нигеҙ булып тора, тигән фекер менән бер кем дә бәхәсләшмәҫ. Был йәһәттән һуғыш һәм хеҙмәт ветерандары, оло быуын вәкилдәре, республиканың, илебеҙҙең сәскә атыуына көсөн һәм тырышлығын йәлләмәгән хеҙмәтсән халҡы оло ихтирамға лайыҡ.

Тыныслыҡ, хеҙмәт һәм май – был һүҙҙәр бөгөн дә көнүҙәк булыуын туҡтатмай. Заман башҡа, заң башҡа тигән фекер хатта урынһыҙҙыр ҙа. Тик шуныһы мөһим – һәр кемдең хеҙмәте кәрәкле тип табылып, юғары баһаланырға тейеш. Былтыр Рәсәй Конституцияһына төҙәтмәләр индерел­гәндә лә ошо йүнәлешкә ныҡлы иғтибар бирелде. Тимәк, был йәһәттән ыңғай үҙгәрештәр булыр әле.

Гөлнур ҠОЛҺАРИНА, Дәүләт Йыйылышы – Ҡоролтай депутаты, Башҡорт ҡатын-ҡыҙҙары йәмәғәт ойошмаһы рәйесе:

– Беренсенән, 1 Май – беҙҙең өсөн хеҙмәт байрамы, сөнки кешеләр, яҙ еткәс, яңырыу кисерә, тирә-яҡты таҙартыу эшенә тотона. Икен­сенән, был – хеҙмәт кешеһенең эшен баһалау көнө. 1 Майҙы беҙ әүҙем үткәрәбеҙ, йәмәғәт ойошмалары ағзалары башлыса өмәләрҙә ҡат­наша. Был көндәрҙә балалар йорттары тәрбиәләнеүселәре өсөн мәрхәмәтлек акциялары ла ойошто­рабыҙ. Кисә Өфөгә республиканың 20 балалар йортонан ҡыҙҙар һәм малайҙар килде. Улар өсөн баш ҡаланы күрһәтеү, КВН һәм башҡа саралар ойошторабыҙ.

Ғөмүмән, бала саҡтан был байрам күңелдә яҡты хәтирәләр булып иҫтә ҡалған. Беҙ “Йәшәһен 1 Май!”, “Йәшәһен хеҙмәт кешеһе!” тип яҙылған транспаранттар тотоп, демонстрацияларҙа йөрөй инек.

Яҙ һәм Хеҙмәт байрамы менән ҡотлайым! Һәммәгеҙгә ныҡлы һау­лыҡ, бәхет һәм именлек теләйем!

Булат ЯНЫБАЕВ, Рәсәйҙең почетлы газ сәнәғәте хеҙмәткәре:

– Был көндө беҙ баҡса, ихата таҙартабыҙ. Элекке кеүек саралар үтһә, ихлас ҡатнашыр инек. Әле бит өмәләр башланған мәл. 30 ап­релдә Белорет башҡорттары ҡорол­тайы ағзалары Белорет ҡалаһын­дағы мосолман зыяратын таҙар­тырға сығасаҡ.