Яҙҙың 50 миҙгеле

– Матур ғүмер кисерҙек, – ти ғаилә башлығы Рәфил Дәүләткилдин. – Шулай булмай, йорт һалдыҡ, баҡса үҫтерҙек, балаларҙы уҡыттыҡ, аяҡҡа баҫтырҙыҡ, хәҙер бына ейәндәребеҙгә ҡарап һоҡла­набыҙ.

Рәфил Ғариф улы буласаҡ кәләше менән... автобуста танышҡан. Ҡыҙ ауылға ҡунаҡҡа китеп барған, ә егет ата-әсәһе йәшәгән Аҙнағол ауылына ашыҡҡан икән. Ҡалғаны барыһы ла беҙҙең өсөн яҡшы таныш “Яҙҙың ун ете миҙгеле” фильмындағыса: егет – ҡыҙҙан, ҡыҙ егеттән ҡараштарын алмаған. Һүҙһеҙ ҙә бер-береһен аңлаған йәш йөрәктәр ай ярым ваҡыт үткәндән һуң өйләнешкән.

– Тәүге осрашыуҙан һуң ул минең эргәмә ятаҡҡа килде. Күрше бүлмәлә йәшәгән Рәфилдең һеңлеһе ағаһы тураһында барыһын да теҙеп һөйләгәс, нисек ышанмай­һың? Өҫтәүенә, ағайығыҙ бик сибәр, бөҙрә сәсле, оҙон буйлы егет ине, нисек ҡаршы төшәһең? – тип шаярта Зәйтүнә Ғәзиз ҡыҙы.

Ул саҡта Рәфил Ғариф улы Күмертау предприятие­лары­ның береһендә борт механигы булып эшләй. Ә һөйгәне “Башкируголь” йәмғиәте теплица­һында хеҙмәт итә.

Яҙҙың илле миҙгеле төрлө мәшәҡәттәр менән һиҙҙермәй генә уҙған. Алтын туй – күп йылдар дауамында һалынған хеҙмәттең татлы емеше. Был хәтлем ғүмер эсендә татыу­лыҡ та, аҡыл да, мөхәббәт тә аҙ талап ителмәгәндер бәхет­ле парҙарға. Тормош юбиляр­ҙарын ҡотларға килгән Ермолаевка ауыл биләмәһе хаки­миәте башлығы вазифаһын башҡарыусы Марина Букреева уларға иң яҡшы теләктә­рен еткерҙе.