+24 °С
Ямғыр
Йәмғиәт
28 Май 2021, 06:02
Парапланда оса, Италия буйлап сәйәхәт итә, тайгала йәшәп ҡарай...
Әле яңыраҡ ҡына Башҡортостан юлдаш телевидениеһында гөрләп үткән “Яңы моң” музыкаль конкурсында күптәр уны күреп һоҡланғандыр. “Башҡортостан гүзәле” бәйгеһенең сираттағы ҡатнашыусыһы – был телевизион проектты алып барыусы Лилиә Әһлиуллина.
Әле яңыраҡ ҡына Башҡортостан юлдаш телевидениеһында гөрләп үткән “Яңы моң” музыкаль конкурсында күптәр уны күреп һоҡланғандыр. “Башҡортостан гүзәле” бәйгеһенең сираттағы ҡатнашыусыһы – был телевизион проектты алып барыусы Лилиә Әһлиуллина.
Лилиә 1990 йылдың 22 ғинуарында Дәүләкән районының Мәкәш ауылында донъяға килә. БДУ-ның башҡорт филологияһы һәм журналистикаһы факультетын тамамлап, әлеге көндә Башҡортостан юлдаш телевидениеһында эшләй.
“Ниндәй ҡаҙаныштарың бар?” тип һорағас, Лилиә тыйнаҡ ҡына итеп: “Улар күп түгел”, – тип яуапланы. Тыйнаҡлыҡ – ысын башҡорт ҡыҙҙарының сифаты, ә шулай ҙа һылыуҡайҙың тел асҡысын систек.
Лилиә БДУ-ла уҡыған йылдарында әүҙем студенттарҙы берләштереп өс йыл дауамында профбюро рәйесе вазифаһын башҡара, параплан клубына йөрөй, үҙен осоусы ролендә һынап ҡарай. Был ғына түгел, ул ике ай Себер тайгаһында йәшәп археологик ҡаҙыныуҙарҙа ҡатнаша. Ҡыҙ сәйәхәткә ғашиҡ – Италияның ҡалаларын бер үҙе гиҙеп сыға, ошо илдә өс ай стажировка үтә.
Беҙҙең бәйге дауам итә! Конкурста һынау тотор өсөн түбәндәге талаптарҙы үтәү мөһим: матур, сифатлы фотоһүрәтегеҙ менән бергә үҙегеҙҙең ҡайһы ҡала, район, төбәктә тыуып үҫеүегеҙ, яратҡан шөғөлөгөҙ, ҡаҙаныштарығыҙ тураһында хат яҙып ебәрегеҙ. Беҙҙең электрон адрес: bashkortostan.gazeta@mail.ru
1-се турҙа һылыуҡайҙар үҙҙәре менән таныштыра. 2-се турға сығыусылар интернет киңлектәрендә тауыш йыясаҡ.
Финалға үтеүселәрҙе жюри ағзалары баһалаясаҡ. Интернет киңлектәрендә иң күп тауыш йыйған ҡыҙ “Интернет һылыуҡайы” номинацияһында билдәләнәсәк.
Конкурсҡа декабрь айында йомғаҡ яһаласаҡ һәм бәйгелә еңеүсе ҡыҙҙың фоторәсеме гәзит календарын биҙәйәсәк.
