Йәшәйешебеҙ балалар менән йәмле!

Ғаилә – йәшәү йәме, бәхет, шатлыҡ, йылылыҡ һәм уңыш сығанағы. Һәр ата-әсә ғәзиз балаһы тип яна, тырыша һәм йәшәй. Кисә илебеҙҙә Ғаилә, мөхәббәт һәм тоғролоҡ көнө билдәләнде. Әйт­кәндәй, байрамдың бил­дә­һе – аҡ сәскә тоғро­лоҡто, хистәр сафлығын һәм йылы мөнәсәбәт­тәрҙе сағылдырғандай.

– Байрам менән ысын күңелдән ҡотлайым. Һеҙ – республикабыҙҙың алтын фонды, – тип сәләмләне республика Башлығы Радий Хәбиров  Өфөләге Колонналар залында тантаналы сараға килгәндәрҙе.  Өфө ҡалаһынан Лариса менән Ренат Сайбатталов­тарға, Стәрлетамаҡ ҡала­һынан Светлана менән Олег Шварёвтарға “Ата-әсәлек даны” ордены тапшырылды. Был награда ғаилә институтын нығытыуға һәм балалар тәрбиәләүгә индереүҙәге тос ҡаҙаныштар өсөн бирелә.Бәләбәй районынан Гөл­наз менән Илфир Сәлим­гәрәевтәргә, Стәрлетамаҡ районынан Таңһылыу менән Илшат Миңлебаевтарға, Рәшиҙә менән Абдулхай Сәйфетдиновтарға, Туймазы районынан Әлфиә менән Ришат Сыртаевтарға, Саҡма­ғош районынан Әминә менән Федрат Мусиндарға, Өфөнән Гүзәл менән Вәғиз Ҡырым­суриндарға, Миәкә районынан Бибинур менән Миң­леғәни Ғәлимовтарға “Ата-әсәлек ҡаһарманлығы” миҙа­лы тапшырылды.– Был награданы әсәйем менән атайым үҙе алырға теләгәйне, тик йылдар үҙе­некен итә: килә алманылар. Ғүмер буйы ил мәнфәғәтенә хеҙмәт иттеләр, бәхетле булдылар, балаларына ла ва­ҡыт таба белделәр. Әсәйем ауылда – уҡытыусы, атайым водитель булып эшләне. Радий Фәрит улы, Һеҙгә һәм ко­мандағыҙға, атай-әсәйем­дең хеҙмәтен ошолай юғары баһалаған өсөн сикһеҙ рәх­мәт­­ле­беҙ, – тине Башҡортос­тан­дың халыҡ артисы Айҙар Ғәлимов.Яҙмыш, ҡыҙғанысҡа ҡар­шы, ағас башынан түгел, кеше башынан йөрөй шул. Саҡмағош районының Имән­леҡул ауылынан Әминә Му­синаның да бәпләп, барлыҡ өмөттәрен бағлап, бәхет юрап үҫтергән улы Фидүстең яҙмышын һөйләгәндә күҙҙә­ренә йәш эркелә. Уның ғәзиз улы бәләкәй сағынан ҡыйыу, тырыш булған, техника яратҡан. Егеттең ғүмере Чечняла Тыуған ил алдындағы хәрби бурысын үтәгәндә ваҡытһыҙ өҙөлгән. Фидүстең әсәһе Әминә Әхтәм ҡыҙына “Ата-әсә ҡаһарманлығы” миҙалы тапшырылды.Күптән түгел Әбйәлил ра­йо­нынан 15 йәшлек Данир Мөхәмәҙиевтең ҡыйыулығы һәммәбеҙҙе һоҡландыр­ғай­ны. Был, әлбиттә, егеттең нин­дәй ғаиләлә тәрбиәләне­үенә лә туранан-тура бәйле, сөнки тап ата-әсә шәхес һы­ҙат­тарын булдыра. Ҡыр­ҙас ауы­лына ҡунаҡҡа барған ҡы­йыу егет һыуға батҡан малай­ҙы ҡотҡарып, уға тәүге ярҙам күрһәтә, туҡтаған йөрәгенә­йәнә “тибергә” ярҙам итә.Данир – күп балалы ғаи­лә­нән. Уның Фәнүр, Юнир исемле ағайҙары, Радмир исемле ҡустыһы һәм Динара исемле һеңлеһе бар. Егеттән беренсе ярҙам итеү ысулда­рын ҡайҙан белеүе хаҡында һорағас: “Уҡытыусым Азамат Нух улы өйрәткәйне. Был хаҡта видео ла ҡарағаным бар ине”,  – тип яуап бирҙе. Данир Мөхәмәҙиевкә – Баш­ҡортостандың Почет грамо­та­һы, уның уҡытыусыһы Азамат Аҫылғужинға Башҡорт­остан Башлығының Рәхмәт хаты тапшырылды.– Тағы бер тапҡыр һеҙҙе ҡотлайым, – тине байрам са­раһы аҙағында Радий Фәрит улы. – Коронавирус инфек­цияһынан үҙегеҙҙе, яҡында­ры­ғыҙҙы һаҡлағыҙ, ауыры­мағыҙ һәм прививка эшлә­тегеҙ.Тантана һуңында награ­да­ға лайыҡ булыусыларға иҫтә­лекле бүләктәр тапшырылды.

Айһылыу НИЗАМОВА