Мишкәлә тормош яйға һалына

Мишкә районы үҙәгендә полилингваль гимназия асырға йыйыналар. Уның сиктәрендә мари телен төптән өйрәнеү мөмкинлеге буласаҡ.

Был хаҡта Башҡортостан етәксеһе Радий Хәбиров урындағы халыҡ менән аралашҡанда әйтеп үтте.

- Башҡортостанда дүрт полилингваль мәктәп эшләп килә: икәүһе Өфөлә, берәүһе Стәрлетамаҡта, берәүһе Нефтекамала. Был мәктәптәрҙең өсәүһе – башҡорт, берәүһе – татар теленә баҫым яһай. Ә һеҙҙә төҙөләсәк гимназияла мари, рус, инглиз телендә белем бирәсәктәр, – тине ул.

Мишкә районы хакимиәте башлығы Павел Трапезников республика етәксеһен муниципалитет үҫешенә булышлыҡ иткән алдынғы проектар менән таныштырҙы. Улар рәтендә – Мишкә ауылындағы 2-се һанлы мәктәп бинаһы янында тағы бер бина төҙөү. Мәктәптә 600-ҙән ашыу бала уҡый, был ҡәҙимге һандан ике тапҡырға юғарыраҡ. 250 балаға тәғәйенләнгән ике ҡатлы бина төҙөү был мәсьәләне хәл итәсәк. Радий Хәбиров был башланғысты хупланы.

Тағы ла бер проект – ул район үҙәге янында аҡҡан Инәк йылға буйын төҙөкләндереү. Киләсәктә бында мәҙәни саралар үткәрергә теләйҙәр. Радий Хәбиров Башҡортостан Хөкүмәтенә был объектты 2022-2023 йылда финанслау мөмкинлеген ҡарарға ҡушты.

Мишкә районында хәл итеүҙе талап иткән тағы ла бер мәсьәлә – ул Мишкә ауылындағы Мәҙәниәт йортон ремонтлау, уның алдындағы майҙанды төҙөкләндереү.

Радий Хәбиров был башланғысты ла күтәреп сыҡты.

Фото: https://glavarb.ru