Янғынға ҡаршы көрәш туҡтамай

Аномаль эҫе көндәр, ерҙең ҡара көйөп ятыуы янғындарға уңайлы шарттар тыуҙырҙы – яңынан-яңы сығанаҡтар ҡабынып ҡына тора.

 Һуңғы тәүлектә 109,96 гек­тарҙа ун ян­ғынды һүндереүгә өлгәшкәндәр. Шул уҡ ва­ҡытта һигеҙ сығанаҡта, 275 гектар майҙанда, “ҡыҙыл әтәс” ҡото­роуын дауам итһә, уларҙың бишәүһе ауыҙлыҡланған. Йәғни Бөрйән урмансылығындағы 77,5 гектар майҙанды ялмаған ике янғынды ҡамауға өлгәшкәндәр, Өфө урмансылығында ике янғын – 40,5 гектар, Әбйәлил урман­сылығында бер янғын – 45 гектар. Белорет районындағы Тир­лән урмансылығында – 102 гектар, Инйәр урмансылығында – ете гектар, Баймаҡ урман­сылығында өс гектар биләмәлә ут ҡотороуын дауам итә.

Аҙна башынан Бөрйән урман­сылығына ҡараған Көньяҡ Үҙән участкаһында хәл киҫкенләшкән. Бында бер-бер артлы ут тоҡанып тора. Алдағы мәғлүмәттәр буйынса, төп сәбәбе – кеше факторы.

“Был урман биләмәһендә ылыҫлы һәм япраҡлы ағастар, йәш үҫентеләр янған. Юғары температура, көслө ел уттың ҡотороуына булышлыҡ итһә лә, Бөрйән урман хужалығы, Бөрйән урмансылығы, Республика урман янғыны үҙәге белгестәре, Урман хужалығы министрлығы аппараты хеҙмәткәрҙәре, урман участкаһын ҡуртымға алған “Уральский лес” йәмғиәте вәкил­дәре тырышлығы менән янғынды ауыҙлыҡлауға өлгәшелде”, – ти урындарҙағы янғындарҙы һүн­дереүгә етәкселек иткән урман хужалығы министры урынбаҫары Венер Вахитов.

Әлеге ваҡытта утҡа ҡаршы көрәштә ерҙе һөрөү һәм асыҡ сығанаҡтарҙы һүндереү алымы киң ҡулланыла. Венер Вахитов белдереүенсә, янғын ҡуртымға алынған участкала сыҡҡан, уны квадрокоптер ярҙамында күр­гәндәр. Тәүге көн утты һүн­дереүҙә яҡындағы Ҡолғана һәм Килдеғол ауылдарынан 30-ға яҡын кеше ярҙамға сыҡҡан. Әле унда тракторҙар ерҙе һөрә, һуңынан ҡеүәтле бульдозер киң минераль һыҙат һыҙа. Халыҡ көрәк һәм ранецтар ярҙамында ҡабынған усаҡтарҙы һүндерә. Шулай уҡ Республика урман янғыны үҙәге хеҙмәткәрҙәре ярҙамға килгән. Әйткәндәй, улар быға тиклем Хәйбулла районында ут һүндереүҙә ҡатнашҡан.

Һуңғы тәүлектә Бөрйән ур­мансылығында биш янғын һүндерелгән, икәүһе ҡамауға алынған. Тыуған ере, тәбиғәте өсөн үҙ өлөшөн индереп, ҡот­ҡарыу эштәрендә әүҙем ҡатнаш­ҡандар ярҙамында өлгәшкәндәр был һөҙөмтәгә.

Бер шырпының, бер осҡондоң ҙур янғынға сәбәпсе булыуын онотмағыҙ. Әгәр урман янғанын йәки ут сыҡҡанын күрһәгеҙ, авария хеҙмәттәренә шылтыра­тығыҙ: Урман һағы­ның бушлай Берҙәм телефоны – 8-800-100-94-00; Башҡортостан Урман хужалығы министрлығының төбәк диспетчер хеҙмәте – 8-347-218-14-14; ҡотҡарыу хеҙ­мәте – 112; янғын хеҙмәте – 01.

Р. МУСИНА.