Йүнселлекте үҫтереүгә – 620 миллион һум

“Хужалыҡ итеүҙең бәләкәй формалары төбәктә ауыл хужалығы продукцияһы етештереү күләмен арттырыуҙа ҙур әһәмиәткә эйә”, – тине Башҡортостан Хөкүмәте вице-премьеры – ауыл хужалығы министры Илшат Фәзрахманов республика кәңәшмәһендә.

Былтыр фермерҙар 27,1 миллиард һумлыҡ продукция етеш­тергән. Быйыл республикалағы дөйөм ауыл хужалығы продукция күләмендә хужалыҡ итеүҙең бәләкәй формаларының өлөшө 15 процентҡа етеүе көтөлә.

Илшат Фәзрахманов ауылда йүнселлекте сис­темалы үҫтереү­гә йүнәлтелгән сараларҙы телгә алды. Уларҙы тормошҡа ашы­рыу­ға 620,1 миллион һум аҡса бүленә. Мәҫә­лән, Рәсәй Президенты Владимир Путиндың май указы менән раҫлан­ған “Бәләкәй һәм урта эшҡыуарлыҡ һәм шәхси эшҡыуарлыҡ башлан­ғысына булышлыҡ итеү” милли проекты­ның “Бәләкәй һәм урта эшҡыуарл­ыҡ субъекттарын акселерациялау” төбәк проекты нигеҙендә ауыл хужалығы ҡулланыусылар кооперативтарын, компетенция үҙәктәрен үҫтереү йәһәтенән саралар күрелә, “Агростартап” программа­һы уңышлы эшләй.

Хужалыҡ итеүҙең бәләкәй формаларына “Агропрогресс”, “Ғаилә фермалары”, ауыл хужа­лығы ҡул­ланыусылар коопера­тив­та­рының матди-техник база­һын үҫтереү программалары буйынса грант бирелә. Улар ҙа ярҙамдың һөҙөмтәле алымын тәшкил итә. Баймаҡ, Әлшәй, Миәкә, Әбйәлил, Ғафури райондары грант программаларында әүҙем ҡатнаша.

- Лилиә ДӘҮЛӘТБӘКОВА.