Гимн, герб – ғорурлыҡ билдәһе

Һәр дәүләттең дәүләт символдары бар, һәм улар уның тарихын, йолаларын, дәүләт сәйәсәте ҡиммәттәрен, өҫтөнлөктәрен сағылдыра. Башҡортостандың дәүләт символдары ошо талаптарға, һис шикһеҙ, яуап бирә.

Бәхетленең байрамы бергә тигән­дәй, 11 ок­тябр­ҙә Республика көнөн билдәләһәк, 12 октябрь  Баш­ҡортостан Респуб­лика­һының Дәүләт гимны һәм гербы тура­һындағы закон­дарҙы ҡабул итеү көнө булараҡ тарих битендә теркәлгән.

Республиканың Дәүләт гербы буйынса эш йыл ярымдан ашыу дауам итә һәм 1993 йылдың 12 октябрендә БР Юғары Советы “Башҡортостан Республика­һының Дәүләт гербы тураһында” Закон ҡабул итә. Республика парламенты тарафынан ҡабул ителгән проектты “Китап” нәш­риәте рәссамы Фазлетдин Ислахов яһай.

Ошо уҡ көндә — 12 октябрҙә “Башҡорт­остан Республика­һының Дәүләт гимны” тураһында Закон ҡабул ителә. Фәрит Иҙри­сов­тың “Республика” тан­таналы көйө Баш­ҡорт­остандың дәүләт гимны булып тора. 2008 йылда уның һүҙҙәре лә ҡабул ителде. Авторҙары – шағир Рауил Бикбаев һәм ғалим Рәшит Шәкүр.

Гимн, герб хаҡында фекер­ҙәре менән ҡыҙыҡ­һынып, бер нисә кешегә мөрәжәғәт иттек.

 Гөлшат ЗАКИРОВА, Архангел мәғлүмәт үҙәге директоры:

– Үҙебеҙҙең гимн һәм герб булыуы – ул ғорур­лыҡ, хужалыҡ­сылыҡ билдәһе. Уларҙың халыҡ­ҡа тәьҫир итеү көсө шул тиклем көслө һәм оло мәғә­нәгә эйә. Мә­ҫәлән, спорт ярыштарында спорт­сы­ларҙы оло еңеүҙәргә әйҙәй.

 Илнур ӘХМӘТШИН, Белорет ҡалаһының Йәштәр үҙә­генең хәрби-илһөйәрлек клубы мөдире:

– Гимн минең өсөн рухты күтәргән моң һәм йыр – беҙҙең азатлыҡ, иреклек билдәһе. Республика гербына ла оло мәғәнә һалынған.

Йәш быуында илһөйәрлекте тәрбиәләү йү­нәлешендә эшлә­үемә бәйле сараларҙа гимнды ла, гербты ла йыш ҡулланам. Бер байрам да улар­һыҙ үтмәй. Гимн һәм герб үҫеп килгән быуында тыуған ергә, илгә һөйөү тәрбиәләүҙә лә ярҙам итә.

- Р. ХӨСНУЛЛИНА.