Һөнәри байрамығыҙ менән!

Башҡортостан Башлығы Радий Хәбиров юл хужалығы хеҙмәткәрҙәрен һөнәри байрамдары менән ҡотланы.

"Автомобиль юлдары беҙҙә бик күп - 49 мең километр тирәһе, шуның 800 километры федераль әһәмиәтле, – тип яҙҙы Радий Фәрит улы. – Ошо күрһәткес буйынса Башҡортостан илебеҙҙә икенсе урында. Беҙҙең республикала “Хәүефһеҙ һәм сифатлы автомобиль юлдары” милли проекты нигеҙендә 2021 йылда 237 төп объектта эш алып барҙыҡ. Уларҙың оҙонлоғо – 300 километрҙан ашыу. Бының өсөн алты миллиард һумдан күберәк аҡса бүленде, шул иҫәптән 1,7 миллиард һум – федераль бюджеттан. Дөйөм алғанда, йыл аҙағына хәтлем 1 260 километр юлды ремонтлау бурысы тора".

Радий Хәбиров билдәләүенсә, 2022 йылда Ҡариҙел һәм Дыуан райондарындағы “Бөрө – Таҫтүбә – Һатҡы” юлын реконструкциялау тамамланасаҡ. Өфөнән көнсығыш яҡтан сығыу юлында йылдам эш бара. Тиҙҙән тиҙ йөрөшлө М-12 юлын һалыу башланасаҡ. Нуғай йүнәлешендә тимер юл аша эстакада, Ағиҙел йылғаһы аша яңы күпер төҙөлә, иҫкеһе ремонтлана.

"Башҡортостандың юл-транспорт комплексы - Рәсәйҙә иң ҡеүәтле, тотороҡло эшләгәндәрҙән. Уның хеҙмәткәрҙәрен һөнәри байрамдары менән ҡотлайым. Был тармаҡта республикабыҙҙа 28 мең самаһы кеше эшләй. Барығыҙға ла тыныслыҡ һәм изгелек!" - тип яҙҙы Радий Хәбиров.

Фото: vedtver.ru