Төҙөкләндереү эше дауам итә

Баш ҡалабыҙҙан артыҡ алыҫ урынлашмаған Ғафури районы биләмәһенең ҙур өлөшө тау-урмандарҙан тора, көнбайыштағы тигеҙлекте Ағиҙел йылғаһы үҙәне биләй.

Күптән түгел “Дәүләт һатып алыуҙары” рәсми сайтында Ғафури районындағы тап ошо Ағиҙел йыл­ғаһы аша күперҙе ремонтлау эштә­ренә 372 миллион һум аҡса йәлеп ителәсәк, тигән мәғлүмәт баҫылды. Документтарға ярашлы, буласаҡ подрядсынан 16 ай эсендә был эштәрҙе атҡарып сығыу талап ителә. Киле­шеүҙең башланғыс суммаһы – 372,3 миллион һум. Проектҡа ярашлы, яр буйҙарын нығытыу, күпер плитәләрен алмаштырыу һәм башҡа эштәр ҡаралған. 406,12 метр оҙонлоғондағы участканы ремонтлауҙы 2025 йылдың 15 сентябрендә тамамларға кәрәк.

Әйткәндәй, Республика көнө алдынан Ғафури районының Красноусол ауылында тағы бер йәмәғәт­селек биләмәһе барлыҡҡа килде.

Красноусол ауылындағы Коммунистик урамдағы аллея “Торлаҡ һәм ҡала мөхите” милли проектының “Ҡала мөхитен формалаштырыу” федераль программаһы нигеҙендә хасил булды.

“Был ер биләмәһенең төҙөклән­дерелгәнгә тиклем нисек булған­лығын бик яҡшы хәтерләйем. Сағыш­тырмаса ҡыҫҡа ваҡыт эсендә ауыл уртаһындағы урын заманса, балалар һәм спорт майҙансыҡтары булған, хәҙер тағы парк зонаһы урынлашҡан уңайлы киңлеккә әйләнде, – тип яҙҙы социаль селтәрҙәге сәхифәһендә Ғафури районы хакимиәте башлығы Фәнзил Сыңғыҙов. – Биләмәнең матур һәм уңайлы булыуы – ҙур хеҙмәт емеше. Был – төҫлө фонтанды ҡороу, тротуар брусчаткаһын һалыу, яҡтыртыуҙы, видеокүҙәтеүҙе ойоштороу, “Мин Красноусолды яратам” арт-объектын, архитектураның бәләкәй формаларын ҡуйыу, йә­шелләндереү, туҡталҡаға асфальт түшәү”.

Саф һауала йөрөү һәм ял итеү өсөн тәғәйенләнгән зонала брусчат­канан тротуар һалынған. Ул Баш­ҡорт­остан Республикаһының төп символы булған ҡурай формаһында эшләнгән. Уның һәр таж япрағы өҫтөндә эскәмйәләр ҡуйылған, сәскәнең төп өлөшөндә “Мин Красноусолды яратам” арт-объекты урын­лашҡан. Аллея уртаһында төҫлө, динамикалы фонтан бар. Был биләмә видеокүҙәтеү һәм яҡтылыҡ менән тәьмин ителгән. Аллеяны асҡанда уҡыусылар 12 ҙур шыршы ултыртҡан.

Подрядсы ойошма – “Ингстрой” яуаплылығы сикләнгән йәмғиәте. Ул,  төҙөлөш эштәрен бер нисә этапта атҡарып, байрамға ҡарай тамам­лаған.

Ғафури районы халҡының уңайлы тормошо өсөн яҡшы шарттар бар­лыҡҡа килтергән, ауыл биләмә­лә­ренең эстетик йөҙөн формалаштырыу өсөн тос өлөш индергән предприятие директоры Бәҙретдин Ғәзгә­рәев һәм уның хеҙмәткәрҙәре район хакимиәтенең рәхмәт хаттары менән билдәләнгән. Ошондай уҡ наградаға йәмәғәтселек биләмәһен төҙөк­ләндереүҙә әүҙем ҡатнашҡан юл төҙөлөш-ремонтлау идаралығы етәксеһе Зөфәр Хафизов һәм уның хеҙмәткәрҙәре лә лайыҡ булған.

Әйткәндәй, парк киләсәктә лә төҙөкләндереләсәк. Бында тағы арт­объекттар, бәләкәй архитектура формалары барлыҡҡа киләсәк, ағастар ултыртыласаҡ.

- Айһылыу НИЗАМОВА