Бәхет сере ниҙә?

"Башҡортостан" гәзитенең "Бәйләнештә"ге төркөмөндә барған әлеге конкурста ҡатнашҡан Лиана Мозафарова – Йәмле Дим буйҙарынан, Әлшәй ҡыҙы. Уны яҙмыш юлдары Ҡырмыҫҡалы егете Динар менән осраштырып, ошондағы Аҡтүбә ауылының килене иткән. Хәҙер дүрт бала әсәһе ул.

Оло ҡыҙҙары Азалия – 4-се, игеҙәктәр Азалина менән Розалина 2-се класта уҡый. Спорт менән шөғөлләнәләр, йырларға, бейергә яраталар, яҡшы уҡыйҙар. Бәләкәй Линарға – өс йәш. Бик шуҡ, етеҙ малай. Ишле, татыу ғаилә үҙҙәре һалып ингән иркен, заманса йортта шау-гөр килеп донъя көтә.

Бешеренергә яратҡанғалыр, Лиана ашнаҡсы һөнәрен үҙ иткән. Балалары хәҙер - уң ҡулы, әсәләре эргәһендә аш-һыу бүлмәһендә уралырға яраталар.  

Күңеленә ял биргән шөғөл – китап, гәзит-журнал уҡыу, шиғыр яҙыу. Сигеү сигергә, ырғаҡ менән бәйләргә ярата. “Мин - бәхетле ҡатын, әсәй. Алдағы көндәрҙә лә шулай берҙәм йәшәргә яҙһын. Тормош сикһеҙ матур!” – ти Лиана Раил ҡыҙы.                                                         

Фотолар ғаилә архивынан.