Еңеү менән ҡайтығыҙ!

Бик тиҙҙән ике студентыбыҙ XV Бөтә Рәсәй "Рәсәй Студенттары мисы һәм мистеры - 2021" конкурсында республика исеменән сығыш яһаясаҡ. Унда илебеҙ төбәктәренән иң яҡшы, һәләтле 57 студент ҡатнаша. Конкурстың маҡсаты: студенттарҙың ижадын ҡурсалау, һәләттәрен асыу, мәҙәни аралашыуҙы нығытыу.

Беҙҙекеләр - Башҡортостан дәүләт аграр университеты студенты - Максим Урюпов һәм Башҡорт дәүләт университетынан - Ләйлә Шәкүрова.

Ләйлә Шәкүрова - "Һылыуҡай-2018" конкурсы еңеүсеһе. Уңған ҡыҙ университеттың философия һәм социология факультетында белем ала. Тыумышы менән Әлшәй районынан. Ләйләнең ҡыҙыҡһыныуҙары төрлө: тырышып уҡыуҙан тыш, халыҡ бейеүҙәре менән шөғөлләнә, модель булып та үҙен һынап ҡарай.

Максим Урюпов "Студент яҙы -2021" төбәк фестивалендә "Автор һүҙе" номинацияһында еңеү яулауы менән билдәле. Булдыҡлы егет Федоровка районынан, шиғырҙар, йырҙар яҙа, гитарала уйнай, спорт менән дә дуҫ.

Бөтә Рәсәй "Рәсәй студенттары мисы һәм мистеры-2021" конкурсы 22 ноябрҙә уҙасаҡ. Талантлы йәштәргә уңыштар теләйбеҙ!
Фото:Bashinform.ru