Бөйөк актриса вафат

Ауыр хәбәр: легендар Совет һәм Рәсәй актрисаһы Нина Русланова оҙаҡ ауырығандан һуң вафат булған. 75 йәшлек актриса бер нисә ай элек  инсульт кисергән, тип хәбәр итә үҙәк баҫмалар.

Нинаны 1946 йылда, уға әле бер йәш тә тулмаған саҡта, балалар йорто тупһаһына ҡалдырып китәләр. Фамилияны ла уға шунда бирәләр: билдәле йырсы хөрмәтенә Русланова булып китә ул. Кино һәм театр сәнғәтенә урау юлдар аша килә ҡыҙ: 1960 йылда ул төҙөлөш училищеһын тамамлай, уҡып бөткәс штукатур булып эшләй. Тик күңеленең ижадҡа тартылыуы уны Мәскәүҙәге Б.В. Щукин исемендәге Театр училищеһына алып килә. Ул унда 1965-1969 йылдарҙа Леонид Филатов, Александр Кайдановский, Иван Дыховичный, Борис Галкиндар менән бергә уҡый.

Нина Русланова - Рәсәйҙең халыҡ артисы. Ул яҡынса 150-ләп фильмда уйнаған, ҡабатланмаҫ образдар тыуҙырған. Тамашасы уны "Небеса обетованные", "Мой друг Иван Лапшин", "Кин-дза-дза!", "Собачье сердце", "Марш Турецкого", "Мама не горюй", "Афоня", "Завтра была война", "Тени исчезают в полдень", "Зимняя вишня" һәм башҡа фильмдар аша яҡшы белә.

Фото:Twitter