"Миңә сәскә бүләк итмәгеҙ..."

Бөгөн республика етәксеһенең хәләл ефете Каринэ Хәбирова тыуған көнөн билдәләй. Әммә беренсе леди байрамға бүләк итеп сәскә гөлләмәләрен ебәрмәүҙе үтенде. Был турала ул "Инстаграм"да пост ҡалдырған.

“Тыуған көндә сәскә бүләк итәләр. Бөгөн минең байрамым, һәм, ғәҙәттә, был көндө бик күп сәскә ебәрәләр. Бөтәһе лә белеп бөтмәйҙер, мин бүләк ителгән гөлләмәләрҙе дауаханалар, көрсөк үҙәктәренә, табиптарға алып барам. Быйыл сәскәләр менән Өфө хосписына ҡараған балаларҙы һәм өлкәндәрҙе шатландырырға тәҡдим итәм. Улар өсөн был ғүмергә иҫтәлек булып ҡаласаҡ”, – тип яҙҙы ул һәм гөлләмәгә тотонорға теләгән аҡсаны хоспис иҫәбенә күсереүҙе һораны.

Каринэ Хәбирова уның был теләге тормошҡа ашһа, бик бәхетле буласаҡмын, ә үҙенә смс-хәбәр итеп сәскә һүрәте ебәрһәләр ҙә етә, тине. “Бүләк ителгән бындай шатлыҡ” буйынса отчет һуңғараҡ баҫыласаҡ, тип хәбәр итте ул.

Форсат менән файҙаланып, беҙ Каринэ Хәбированы матур ғүмер байрамы менән тәбрикләйбеҙ. Уға оҙон ғүмер, ғаилә бәхете, һаулыҡ теләйбеҙ!

Фото: Инстаграм.