Ҡышҡы оҙон кистәрҙә ни эшләргә?

• Иртән торғас та сәй эс.
• Эшең бармаһа, беренсе ҡағиҙәгә ҡара: тәүҙә сәй эс.
• Иҫеңдә тот: сәй өшөгәнде йылыта, ҡайғырғанды йыуата, ярһығанды тынысландыра, бар мәшәҡәттәрҙе хәл итә.
• Ҡоро сәй шөпөрләтмә. Асыҡһаң, сәйҙе – ҡоймаҡлап, һыуһаһаң – ҡарағатлап, өшөһәң – баллап, эҫелә ҡоротлап эс.
• Эсең бошһа, дуҫыңды сәйгә саҡыр.
• Дуҫың ҡайғы кисерһә, сәйгә әйт.
• Күршеңә ҡунаҡ килһә, ҡунаҡты сәй янына ал.
• Күршең йомошҡа инһә, сәйеңде шыжлат.
• Ҡапыл ҡунаҡ килһә, сәй ҡуй.
• Ҡунаҡҡа барһаң, сәйгә күстәнәс ал.
• Йома көндө йома сәйе эсер.
• Ҡәйнә булһаң – кейәү сәйе, бейем булһаң – килен сәйе эсер.
• Яҙын кәкүк сәйенә сыҡ.
• Йәй сәйгә үлән киптер, ҡаҡ ҡой, ҡайнатма ҡайнат.
• Ҡышҡы оҙон кистәрҙә дуҫтар менән бер-берегеҙгә сәйгә йөрөшөгөҙ.
• Төнөн йоҡлай алмаһаң, тороп, сәй эс.
• Иң һуңғы һәм иң төп ҡағиҙә: кофе эскәндән һуң мотлаҡ сәй эс!

 (“Киске Өфө” гәзитенән).

Фотолар: асыҡ сығанаҡтарҙан.