“Яҡты хыялдарыбыҙ ғәмәлгә ашыр”

Билдәле актер, Башҡортостандың атҡаҙанған артисы, һәр ролендә тамашасыны әсир иткән һоҡланғыс талант эйәһе Руслан Хайсаров та Барыҫ йылында тыуған.

Ошо йылда тыуған ке­шеләргә хас һыҙаттар унда ла бар. Буласаҡ актер Кү­гәр­сен районының Бикес ауы­лында тыуып үҫә. Бер нисә йылдан ғаилә Мәләүез ҡала­һына күсенә. Атаһы заводта, әсәһе сауҙа өлкәһендә ябай хеҙмәткәрҙәр булып эшләй.

Бала сағынан Руслан ны­ҡышмал, тырыш, маҡсат­лы булып буй еткерә. Мәлә­үез ҡалаһының 9-сы башҡорт мәк­тәбендә уҡый. Балалар ижад йортонда ойошто­рол­ған драма түңәрәгендә шө­ғөлләнә. Мәктәп тормошоноң уртаһында ҡайнап йәшәй: бер генә сара, тамаша ла уның ҡатнашлығынан тыш үтмәй.

Барыҫ йылында тыу­ған­дар – көслө характерлы шә­хестәр, икеләнеүҙе ярат­майҙар, үҙҙәре ҡарар ҡабул итә, ҡатмарлы булһа ла, юлдарын үҙҙәре һайлай, һәр саҡ алға ынтылалар, тиелә йондоҙнамәлә.

Ата-әсәһе, Руслан килә­сәктә юрист һөнәрен һайлар, тип уйлай, әммә егеттең күңелендә бала сағынан тормошон сәнғәт менән бәйләү хыялы бөрөләнгән була. Аттестат алғас, ул З. Исмәғилев исемендәге Өфө дәүләт сәнғәт академияһының театр бүлегенә уҡырға инә.

Студент йылдарын һағы­нып иҫләй Руслан. Көслө, талапсан, үҙ һөнәрҙәренең оҫталары булып танылған остаздарының һәр дәресен көтөп алып, ләззәт табып белем ала ул.

Хеҙмәт юлын Милли йәш­тәр театрында башлай, шунан Стәрлетамаҡ дәүләт театрына күсә. Күп тә үтмәй, Ишембай районында уҙға­рылған Салауат йыйынында йәш һәм талантлы актерҙың сығышын Хөрмәтулла Үтә­шев күреп, Башҡорт дәүләт драма театрына эшкә саҡыра.

2008 йылдан алып Руслан Хайсаров республиканың төп театрында эшләй. Ошо ва­ҡыт эсендә ул тамашасының яратҡан актерына әйләнә, һәр кемдең күңеленә хуш килерлек, иҫтә ҡалырлыҡ бик күп сағыу образдар тыуҙыра. Талантлы актерға спектакл­дәрҙә төп ролдәрҙе ышанып тапшыралар.

“Урал батыр” эпосында төп геройҙы, Туфан Миң­нуллиндың “Мулла”һында – Әсфәндиәрҙе, Мөхәмәтша Буранғоловтың “Шәүрәкәй” спектаклендә – Сураҡай, Мос­тай Кәримдең “Ай тотолған төндә” трагедия­һында – Аҡ­йегет, “Ауыл адво­каттары”н­да – Аҡ гвардеец, Илшат Йомағоловтың “Нәркәс”ендә – Тимерхан, Редьярд Кип­лингтың “Маугли” әҫәрендә – Маугли һәм башҡа тиҫ­тәләрсә ролде башҡарып, тамашасы һөйөүен яулай.

Руслан Хайсаров 2016 йылда Екатеринбург ҡала­һын­да уҙға­рыл­ған Х Халыҡ-ара “КОЛЯДА-PLAYS” театр фестивалендә Я. Пу­ли­новичтың “Йәнем, иртәгә яңы көн тыуыр” спектаклендәге Альберт роле өсөн “Иң яҡшы ир-егет роле” номинация­һында еңеү­се тип таныла. 2019 йылда “Баш­ҡортостан Рес­публикаһының атҡаҙан­ған артисы” тигән маҡтаулы исем бирелә.

Руслан Сәғит улы кино жанрында ла үҙен һынап ҡарай. Ул Булат Йосоповтың “Бабич” һәм “Беренсе республика”, Александр Гали­биндың “Һеңлекәш” нәфис фильмдарында, бер нисә ҡыҫҡа метражлы кинола төшкән. Бынан тыш, ул республика кимәлендә уҙға­рылған мөһим концерттар­ҙың, сараларҙың, тантана­лар­ҙың оҫта алып барыу­сыһы булараҡ та киң танылыу яулаған.

Йондоҙнамәлә, Барыҫ йылында тыуған кешеләр ерҙә ныҡлы баҫып тора, көслө рухлы, үҙҙәренә лә, баш­ҡаларға ҡарата ла талапсан, килә­сәктәрен асыҡ күҙаллай, яҡшы етәкселәр, әйҙәүселәр, улар өсөн иң мөһиме – ғаиләләренең, яҡындарының именлеге, тиелә. Был тап Руслан Хайсаровҡа төбәп әйтелгән кеүек. Ул һәр эшен алдан планлаштырып, уйлап, еренә еткерергә күнеккән.

Руслан Сәғит улы – өлгөлө ғаилә башлығы. Ҡа­тыны, театр актрисаһы Гөл­наз Фәнил ҡыҙы менән Алам­гир исемле ул үҫтерә­ләр. Хайсаровтар һәр ҡайҙа ла әүҙем, ғаилә менән сәйәхәт итергә, бигерәк тә тауҙарға артылырға яраталар, бар эште лә бергәләп баш­ҡаралар.

– 2021 йыл һеҙҙең өсөн нисек булды, нимәһе менән иҫегеҙҙә ҡалды, киләһе йыл­ға ниндәй өмөттәр бағлай­һығыҙ һәм Яңы йыл байрамын нисек ҡаршы алырға йы­йынаһығыҙ? – тип һора­йым йыл хужаһы вәкиленән.

– Былтырғы йыл беҙҙең ғаилә өсөн, дөйөм алғанда, тотороҡло булды. Әлбиттә, һөнәри өлкәлә пандемия сик­ләүҙәре арҡаһында тотҡар­лыҡтар булды, шулай ҙа ижади эш дауам итте. Иң мөһиме – үҙем, яҡындарым иҫән-һау.

Киләһе йыл уңышлыраҡ булыр, тип ышанам, сөнки үҙемдең йылым тыуа бит. Барыҫ йылы – барын сәс, тип юҡҡа әйтелмәгәндер, тимәк, нимәгә тотонһаҡ та, уңышлы булырға тейеш. Алла бирһә, коронавирусты еңеп, ҡәҙимге тормошта йәшәй башларбыҙ, театр тамашасы менән тулыр, гастролдәр тергеҙелер, тип ышанам.

Байрамды ғаиләм менән бергә ҡаршы аласаҡмын. Улыбыҙ тыуғансы, беҙ Гөлназ менән Яңы йыл төнөндә корпоратив саралар үткәрә тор­ғайныҡ. Хәҙер өйҙә булабыҙ, сөнки Яңы йыл – ғаилә байрамы. Ғәҙәттә, сәғәт 12-нән һуң дуҫтарыбыҙ ҡунаҡҡа килә, мин йыл һайын Ҡыш бабай булып кейенеп, өйҙәгеләрҙе генә түгел, күрше-тирәне лә ҡотлап сығам. Был юлы ла шулай итәсәкмен.

Гәзит уҡыусыларға, иң мөһиме, ныҡлы һаулыҡ, имен тормош, бар хыял­дарының тормошҡа ашыуын теләйем. Бер-берегеҙҙе, яҡында­рығыҙҙы һаҡлағыҙ, ҡәҙер­ләгеҙ, сөнки ғаиләһе, яҡындары иҫән-һау, бергә булғанда ғына, кеше үҙен тулыһынса бәхетле итеп тоя бит, – тигән теләктәрен еткерҙе Руслан Хайсаров.

Римма СОЛТАНОВА.