Шифаханала булғандай хис иттем

Өфөләге Республика һуғыш ветерандары госпиталенең яңы бинаһы Өфөнөң 450 йыллыҡ юбилейы уңайынан төҙөләсәк объекттар  исемлегенә индерелеүен белеп, ныҡ шатландым. Был документҡа ярашлы, госпиталде төҙөү һәм медицина ҡорамалдары менән йыһазландырыуға            алты миллиард һум аҡса бүленгән.

Бөгөнгө ҡатмарлы заманда, коронавирус пандемияһы  ҡотор­ған мәлдә, күп кенә дауахана “ҡыҙыл зона”лар итеп үҙгәр­телде. Республикабыҙҙың Һаулыҡ һаҡ­лау министрлығы, Туҡай урамын­дағы Республика һуғыш ветерандары госпитален коронавирусҡа ҡаршы көрәшкә йүнәлтеп, уның паллиатив бүлеген К. Маркс ура­мындағы 31-се йортҡа ваҡытлыса күсереп, бында  ветерандарҙы дауалап, аяҡҡа баҫтырыу эше дауам итә.

Миңә яңыраҡ ошо  госпиталдә һаулығымды нығытыу бәхете насип булды. XIX быуатта уҡ ҡыҙыл кирбестән төҙөлгән мөһабәт бина  Өфө халҡының һәм ҡунаҡтарҙың күҙенә салынмай ҡалмайҙыр, мо­ғайын. Уның ишеген асып инеү менән иң беренсе күҙгә салын­ғаны – бын­дағы тәртип, бөхтәлек, таҙалыҡ. Ә хеҙмәткәрҙәр ниндәй иғти­барлы, мөләйем! Уларҙың фиҙа­кәр тырышлығы, барлыҡ дауалау алымдары ветерандарҙың һаулығын нығытыуға йүнәл­телгән. Бында дауалау гимнас­тикаһы, төрлө массаж, физиотерапия һәм башҡа ысулдар киң ҡулланыла.

Госпиталдең баш табибы Хәлил Мөжәүир улы Мостафин үҙе һымаҡ эшлекле, белемле, па­циенттарға иғтибарлы, хәстәр­лекле белгес­тәрҙе туплай алған. Бындағы медицина хеҙмәткәр­ҙәренең байтағы – юғары һәм беренсе категориялы һөнәр эйәләре. Коллективтағы татыу­лыҡ, берҙәмлек шунда уҡ күҙгә ташлана. Был тәңгәлдә, әлбиттә, Хәлил Мөжәүир улының ойоштороу һәләте күҙгә салына.

Мин дауаланған бүлекте юғары категориялы табип Гүзәл Кәшиф ҡыҙы Латипова етәкләй. Ул – тыныс, баҫалҡы, тәжрибәле белгес. Дауалаусы табибым Әлмира Ғөзәйер ҡыҙы Хөсә­йенова тураһында ла маҡтау һүҙҙәре генә әйтә алам. Ул пациенттарының һаулығын даими рәүештә  контролдә тота, дауалау алымдарын коррекциялай. Былар­ҙың барыһы ла пациентты тиҙ арала һауыҡтырыуға йүнәлтелгән.

Урта һәм кесе медицина персоналына ҡарата ла рәхмәттән башҡа һүҙ юҡ. Туҡланыу бүлеге хеҙмәткәрҙәре тәмле, туҡлыҡлы аш менән ҡыуандыра. Ғөмүмән, ҡыҫҡа ғына ваҡытта һаулы­ғымды нығытып, үҙемде шифаханала булғандай хис итеп сыҡтым.

Республика һуғыш ветерандары госпиталенең паллиатив бүлеге хеҙмәткәрҙәренә еңел булмаған эштәрендә уңыштар, ҡоростай ныҡлы һаулыҡ теләйем!

Йәүҙәт ӘХТӘМОВ, хеҙмәт ветераны.

Өфө ҡалаһы.