Күрше төбәк скауттары беҙҙә булды

22 ғинуарҙан 25 ғинуарға тиклем Өфө уҡыусылары, педагогтар һәм ирекмәндәр “Этнохаус” проект-экспедицияһы сиктәрендә Рәсәй халыҡтары уйындары менән танышҡан.

Сараны Президент гранттары фонды ярҙамында “Татарстан скауттары” скауттар үҙәге ойошторған. “Тамыр” балалар һәм үҫмерҙәр үҙәге, “Башҡортостан скауттары” үҙәге, проект ирекмәндәренә мәҙәни һәм уйындар программаһын тәҡдим итеп, булышлыҡ иткән.  

Проекттың маҡсаты – Татарстанда йәшәгән халыҡтарҙың туған телдәрен, мәҙәниәттәрен, йолаларын һаҡлау һәм йәштәр араһында үҫтереү, Татарстан скауттарының Рәсәйҙең милли мираҫына яҡшы мөнәсәбәтен формалаштырыу, республикалағы, ил төбәктәрендәге ирекмәндәр, ата-әсәләр һәм педагогтар йәмәғәтселегенә хөрмәт күрһәтеү буйынса уңышлы эш тәжрибәһен таратыу.

Ҡазан скауттары аэропорттан ике ҡатлы автобуста Өфө ҡалаһы буйлап экскурсияға йүнәлгән. Икенсе көндә улар Башҡортостандың Милли музейында булған, Республика дәүләт академия рус драма театрында “Аҡбуҙат” рок-операһын ҡараған, шулай уҡ Өфө скауттары менән “Башҡортостандың милли аш-һыу бүлмәләре” лотоһын уйнаған. Өсөнсө көндә йәштәр сәйәсәте өлкәһе педагогтары һәм ирекмәндәре өсөн семинар-практикум ойошторолған, уның барышында Рәсәй халыҡтарының "Төлкө һәм ҡаҙҙар", лапта кеүек 20-нән ашыу онотолған уйындарын өйрәткәндәр. 

Семинарҙа ҡатнашыусылар араһында Башҡортостандың Бала хоҡуҡтары буйынса вәкиле Ольга Панчихина ла булған. Ул, проект милли мәҙәниәттәр вәкилдәре өсөн музыка, уйындар, бейеүҙәр, һөнәрҙәр ҡиммәтен арттырырға булышлыҡ итә, тигән ышаныста. Бынан тыш, өсөнсө көндә Өфө үҫмерҙәр клубтары араһында Рәсәй халыҡтарының өҫтәл һәм хәрәкәтсән уйындары буйынса турнир үткәрелгән.

Фото: БР Йәмәғәт палатаһы.