Күптәнге хыял тормошҡа ашасаҡ

Заманса йыһазландырылған фельдшер-акушерлыҡ пункты – ауыл биләмәләре өсөн бик кәрәкле социаль объект. Ул элек-электән ауыл кешеһе өсөн төп дауалау учреждениеһы булып торған һәм әле лә шулай. Ә ауыл фельдшеры – урындағы халыҡтың күҙ терәп торған таянысы.

Бөгөн һаулыҡ һаҡлау мәсьә­ләһе бигерәк тә көнүҙәк. Шуға ауылдарҙа тулыһынса санитария талаптарына яуап биргән, тейешенсә йыһаз­ландырылған фельдшер-акушерлыҡ пунктта­рының булыуы зарур. Стәр­лебаш районының Йәшергән һәм Һарайҫа ауылдарында фельдшер-акушерлыҡ пункттарының асылыуы көтөлә. Был яңы медицина ойошмаларында па­циенттарға сисенеү, ҡабул итеү, процедуралар яһау өсөн айырым бүлмәләр ҡаралған. Бынан тыш, дарыуҙар, медицина ҡал­дыҡтарын һаҡлау, стерилләү бүлмәләре барлыҡҡа киләсәк. Бында медицина ярҙамы һорап килгәндәр өсөн башҡа уңайлыҡтар ҙа булдырыласаҡ. Уларҙың барыһы ла “Һаулыҡ һаҡлау” милли проекты сиктәрендәге “Беренсе медицина-санитария ярҙамының үҫеше” федераль проектының “Һаулыҡ һаҡлауҙың беренсе звеноһын заманлаштырыу” төбәк прог­раммаһын тормошҡа ашырыу һөҙөмтәһендә мөмкин буласаҡ. Был киң масштаблы проект Рәсәй Президенты Владимир Путиндың ҡушыуы буйынса атҡарыла.

Подрядсы ойошма, Йәшергән һәм Һарайҫа ауылдарындағы фельдшер-акушерлыҡ пункттарын төҙөп бөтөп, эске биҙәкләү эштәренә тотонған. Улар быйыл барлыҡ төҙөлөш һәм монтажлау эштәрен тамамларға, кәрәкле ҡорамал менән йыһазлан­дырырға һәм файҙаланыуға тапшырырға уйлай. Тимәк, республикалағы тағы ике ауыл халҡының күптән көткән уй-хыялы тормошҡа ашасаҡ.

Айһылыу НИЗАМОВА