Ауылға төҙөк күпер кәрәк

Балтас районының Көнтүгеш ауыл мәҙәниәт йортона йыйылып, халыҡ ошо хаҡта фекер алышты.

Йыйылыштың көн тартибенә быйыл "Урындағы башланғыстарҙы яҡлау" программаһында ҡатнашыуға ҡағылышлы мәсьәлә ҡаралды. Сарала ауыл халҡының 112 гражданынан бары егерме кеше ҡатнашты. Был сикләү хәүефһеҙлек сараһы менән бәйле ине. Көнтүгеш ауылы советы етәксеһе Игорь Йәниев йыйылыштың рәйесе булып сығыш яһаны, ауыл халҡы иһә, йылдағыса, бер тауыштан программала ҡатнашырға ризалыҡ белдерҙе.

Ауыл халҡына хәл итәһе проблема тураһында оҙаҡ уйланырға кәрәкмәй, сөнки бында Көнтүгеш йылғаһы аша күпер емерек хәлдә. Уны төҙөкләндереү мөһим. Хаҡлы ялдағы Риф Миңлеғәлин менән Рәфизә Гәрәева үҙ фекерҙәрен белдерҙе.

"Күперҙең төҙөк булыуы бар ауылдаштар өсөн дә кәрәк. Уның аша халыҡ урманға, бесәнлеккә, шишмә һыуына, быуа буйына йөрөй. Ауыл мәҙәниәт йортонда ойошторолған “Аманат” фольклор ансамблендә ҡатнашҡан дүрт кеше ошо күпер аша үтеп йөрөргә мәжбүр. Һыу бер яҡтан ярын йыуған, өҫтөндәге плитәләр емерелгән. Ауыл ерендә мейес яғып йылытылған өйҙәрҙә ғүмер кисергән, күпселек өлкән йәштәгеләргә, уларҙың ҡайтып йөрөгән балаларына күп уңайһыҙлыҡтар тыуҙыра был күпер", - ти Рәфизә Әсхәт ҡыҙы.

Һөйләшеү барышында залда ултырған бар халыҡ программа нигеҙендә Көнтүгеш йылғаһы аша күперҙе капиталь төҙөкләндереү проблемаһын һайлап бер тауыштан ҡул күтәрҙе. Халыҡтан йыя торған өлөштө сметала ҡаралған сумманың ун проценты күләмендә индерергә килештеләр.

Йыйылышта ауылда йәшәгән иң әүҙем кешеләрҙән торған инициатив төркөм төҙөлдө, улар өйҙәр буйлап йөрөп халыҡҡа программа шарттарын аңлатты. Коронавирус таралыу хәүефен иҫкәртеү саралары күрелде.

Әлеге мәсьәләнең хәл ителеүен теләп, Иванай мәктәбе уҡыусылары теләктәшлек белдерҙе. Улар волейбол ярышы үткәрҙе.

Ауыл халҡының маҡсаты – конкурс шарттарын уңышлы үтеп, күперҙе төҙөкләндереү. Был аҙым ауыл халҡының тормошона яңы һулыш өҫтәр ине.

Аидә ХӘЙРЕТДИНОВА.

Балтас районы.

Ғәзим Талипов фотолары.