Ғәйниямаҡтар булдыра ул!

“Айыҡ ауыл-2021” конкурсының муниципаль этабында еңеү яулаған Әлшәй районы Ғәйниямаҡ ауылында “Ауылпиада” үтте. Иртә менән мәҙәниәт йорто майҙанында һәм мәктәп фойеларында йәрминкәләр һәм биҙәү-ҡулланма сәнғәте күргәҙмәләре эшләне.

 Байрамды асыу тантанаһында Ғәйниямаҡ ауыл биләмәһе хакимиәте башлығы Алик Усманов, Әлшәй районы башҡорттары ҡоролтайы рәйесе, мәҙәниәт бүлеге етәксеһе Мирғәсим Әкимбәтов, Ғәйниямаҡ ауылы старостаһы Реваль Дәүләтшин сығыш яһаны. Күңелле ваҡиғаны тамаша ҡылырға Миәкә районынан, Әлшәй районының Никифар ауыл биләмәһенән ҡунаҡтар килде.

Уҡыусылар мәҙәниәт учреж­дениеһы хеҙмәткәрҙәре менән берлектә “Рәсәй, алға!” флешмобын ойошторҙо. Килгән ҡунаҡтар төрлө спорт уйындарында ҡат­нашты: биатлон, ат ярышы, ҡатын-ҡыҙҙар хоккейы, гер күтәреү, суҡмар атыу, “Тарт-төрт” уйыны, бесән йөгөн тағатыу, арҡан тартышыу, уҡтан атыу буйынса оҫталыҡ дәресен алды.

Райондың ижади көстәре һә­үәҫкәр йырсылар, гармунсылар, вокал ансамблдәре һәм башҡалар әҙерләгән сығыш барыһына ла оҡшаны. Асыҡ һауала ауылдаштар көсө менән байрам сәйе лә ойошторолдо, төрлө тәм-том, усаҡта бешерелгән тәмле былау менән һыйландылар.

Ғөмүмән, ғәйниямаҡтар Ауылпиаданы күңелле һәм файҙалы үткәрҙе, байрам һәр кемдең кү­ңелендә онотолмаҫлыҡ хис-тойғолар ҡалдырҙы. Әле ауыл халҡы “Айыҡ ауыл-2021” кон­курсының республика этабында һынатмаҫҡа әҙерләнә.

Д. САЯПОВА.

Әлшәй районы.