Был дарыуҙар менән тәьмин итер өсөн кәрәк

“Башҡортостанда фельдшер-акушерлыҡ пункттарында дарыухана асып була, тип ишеткәйнем. Ошо хаҡта аңлатып яҙмаҫһығыҙмы икән?

З. Ибраева”.

– Башҡортостанда фельдшер-аку­шерлыҡ пункттарын лицензиялау тамамланып килә. 22 февралгә ҡарата Башҡортостанда ФАП-тарҙың  99 проценты фармацевтика эшмәкәр­легенең дарыу препараттарын берәмләп һатыу йәһәтенән лицензия алған.

– Республикалағы медицина эшмә­кәр­леген алып барыуға лицензияһы булған 2061 фельдшер-акушерлыҡ пунктының 2045-енә республиканың Һаулыҡ һаҡлау министрлығы тарафынан халыҡҡа дарыу препараттары менән сауҙа итер өсөн лицензия рәсмиләштерелде, – тип белдерҙе Башҡортостандың Һаулыҡ һаҡлау министрлығының лицензиялау бүлеге етәксеһе Эльвира Тәхәүетдинова.

Былтырғы ошо осорҙа 2068 фельдшер-акушерлыҡ пунктының 1887-һенә генә ошондай лицензия бирелгән ине. Республиканың Һаулыҡ һаҡлау ми­нистр­лығының ФАП-тарҙы лицензиялау буйынса эшмәкәрлеге Рәсәй Хөкүмәтенең дарыуханалар булмаған ауылдарҙа ФАП-тарға, амбулато­рияларға һәм дөйөм табиплыҡ практикаһы үҙәктәренә фармацевтика лицензияларын биреү процедура­һының ябайлаштырылыуы менән бәйле. Бынан тыш, ауылдағы медицина хеҙмәткәрҙәренә өҫтәмә фармацевтика буйынса белем алмайынса дарыу һатырға рөхсәт иттеләр.

 –  Атап үтелгән ойошмаларға фармацевтика лицензияһын алыр өсөн ғаризала медицина ойошмаһы план­лаштырған дарыуҙар менән берәмләп сауҙа итеү, һаҡлау буйынса эш төр­ҙәрен күрһәтергә кәрәк. Шул уҡ ваҡытта хеҙмәткәрҙәргә препараттар менән берәмләп сауҙа итер өсөн өҫтәмә һөнәри белем лицензияһының барлығын раҫларға кәрәкмәй. ФАП, биләмәлә дарыухана ойошмаһының барлығы-юҡлығына ҡарамаҫтан, автоматик рәүештә фармацевтика эшмә­кәрлегенә лицензия ала. Был ауыл­дарҙы дарыуханаларҙан тыш дарыу­ҙар менән тәьмин итеү проблемаһын хәл итергә булышлыҡ итәсәк, –  тип аңлатты Эльвира Тәхәүетдинова.

Башҡортостандың Һаулыҡ һаҡлау министрлығы бар ойошмаларға ла медицина эшмәкәрлеге буйынса лицензия алыу йәһәтенән төрлө яҡлап булышлыҡ итә. Тап ошо маҡсатта лицензия алыу буйынса “ҡыҙыу бәйлә­неш” барлыҡҡа килгән, һәм ул рес­публиканың Һаулыҡ һаҡлау министр­лығы сайтында эшләп килә. Уның ярҙамында медицина эшмәкәрлеген ҡайтанан рәсмиләштереү ваҡыты – 19 көн, ә 2011 йылдың 4 майында ҡабул ителгән “Эшмәкәрлектең айырым төрҙәрен лицензиялау тура­һында”ғы 99-сы Федераль законға ярашлы, лицензияны алыу ваҡыты 30 эш көнө тәшкил итә.

Айһылыу НИЗАМОВА