Бөтә яңылыҡтар
Йәмғиәт
19 Апрель 2022, 14:55

Төрлө һөнәрҙәргә маһир кеше ул

Уның етәкселегендә төҙөлгән иман йорто асылған.

“Бәйләнештә” социаль селтәренән алынды.
Фото:“Бәйләнештә” социаль селтәренән алынды.

Танылған шағир, С. Юлаев исемендәге дәүләт премияһы лауреаты, инде мәрхүм Ирек ағай Кинйәбулатов, ғәҙәтенсә Матбуғат йортона килгәс, минең янға инде.

 – Табын ырыуы гимнының һүҙҙәрен яҙҙым, көйөн кем яҙыр икән, – тип башланы ул әңгә­мә­не. – Профессиональ композитор­ҙарға бирһәм, аҡсаны күп һорарҙармы икән?

– Ирек ағай, үҙебеҙҙең район­да көй яҙған егеттәр бар бит, шуларға мөрәжәғәт итәйек!

Бер нисә аҙнанан ул яңынан минең эргәгә керҙе, һоро порт­фе­ленән флеш-карта сығарып:

– Әйҙә ҡуй компьютерыңа, тың­лап ҡарайыҡ.

Тыңланыҡ бер нисә ҡабат. Гимнға тартым, дәрт­ле, әммә һал­маҡ, бер үк ва­ҡытта тулҡын­ландырғыс әйбер килеп сыҡҡан. Ағайҙы ихлас ҡотланым.

– Көйөн һинең ауылдашың Азамат Сәйфуллин яҙҙы, – тип һөйөндөрҙө мине Ирек ағай.

Азамат Ғәйфуллиндың Өфө­ләге музыка интернатында уҡы­уын, һуңынан музыка училище­һын тамамлауын белә инем, баянда уйнағанын ишеткәнем дә булды, әммә уның көйҙәр ҙә яҙғанын кем белһен.

Бына шундай зауыҡлы, төрлө һөнәрҙәргә маһир кеше ул яҡ­ташым, әлеге көндә Ҡырмыҫ­ҡалы районының Иҫке Бәпес ауыл биләмәһенең башлығы Азамат Муса улы Ғәйфуллин.

Ул Муса ағай менән Рәшиҙә апайҙың ҙур ғаиләһендә иң төп­сөгө ине, биш ҡыҙ араһында үҫте, шуғалыр ҙа тормош уға үҙе етмеш төрлө һөнәрҙе үҙ итергә ҡуш­ҡандыр. Атаһы ғүмер буйы шофер, әсәһе ауылыбыҙ мәктә­бендә уҡытыусы булды.

Азамат үҙе лә хеҙмәт юлын Ма­лай ауылы мәктәбендә башланы, тәүҙә уҡытыусы, мәктәп директоры, Ҡамышлы ауыл советы рәйесе... Йәш, тырыш, ҡуй­ған маҡсатына ирешеүҙе булмы­шының мөһим бер талабы тип ҡуй­ған егетте үрләттеләр, район хакимиәте башлығының социаль мәсьәләләр һәм кадрҙар буйынса урынбаҫары итеп ҡуй­ҙылар. Ун ике йыл тартты ул ауыр йөктө, эшсәнлеге, оҫта ойош­тороусы булыуы, кеше ме­нән кешесә эш итеүе арҡаһында Азамат Муса улы райондаштары, яҡташтары араһында оло абруй яуланы.

Ҡырмыҫҡалы районы халыҡ һаны яғынан да, иҡтисади йәһәт­тән дә республикалағы иң ҙур һәм көслө төбәктәрҙән һанала. Күп һанлы мәғариф, мәҙәниәт учреждениеларының эшен яйға һалыу, социаль өлкәләге пробле­маларҙы тейешенсә хәл итеү ке­үек бурыстарҙы үтәне урынбаҫар.

Рәсәй, республика кимәлен­дә­ге төрлө сараларҙы ойоштороу, районда үткәрелгән һәр сараны күҙ уңынан ысҡындырмай кон­трол­дә тотоу ҙа уның өҫтөндә ине.

Бындай яуаплы, үтә мәшә­ҡәт­ле вазифаны намыҫ менән баш­ҡарҙы Азамат Муса улы, әммә көсөргәнешле эш тора-бара үҙен һиҙҙерҙе, дауахана, ҡатмарлы операция...

Ике-өс йыл еңелерәк эштә йөрөп һаулығын нығытҡас, кире үҙенә таныш һәм яҡын хеҙмәткә ҡайтты – Иҫке Бәпес ауыл билә­мәһен етәкләне. Совет заманында ауылда колхоз рәйесе йәки совхоз директоры абруйлы булды, бөтә мәсьәлә-проблемалар буйынса уға мөрәжәғәт итәләр ине, сөнки уның ҡулында – аҡса, техника, материаль сығанаҡтар.

Хужалыҡтар тарҡалғас, был мәшәҡәттәр ауыл советы рәйесе (элеккесә әйткәндә) өҫтөнә төштө. Әммә шуныһы бар, рәйестең хоҡуҡтары, эш даирәһе ҙур булһа ла, финанс мөмкинлектәре самалы, бюджеттан килгән йә иһә һалымдан алынған аҡса, ауылса әйткәнсә, бөтә “тишек-тошоҡ­тар­ҙы” ла ҡапларға етмәй, тартып-һуҙып көн күрергә, өҫтәмә мөм­кинлектәр эҙләргә тура килә.

Әлбиттә, был проблемалар Аза­мат Муса улы етәкләгән билә­мәгә лә хас, әммә инициативалы, үҙ эше өсөн янған кеше булараҡ, ул яйын таба белә, урындағы мөмкинлектәрҙе, русса әйткәндә, эске “резервтарҙы” файҙаланып, халыҡтың тормошон яҡшыртыу, көнкүреше ки­мәлен күтәреү буйынса байтаҡ эштәр башҡара. Әйтәйек, ул ошонда килгәс, бөтә ауылдарҙа ла урамдар тулыһын­са яҡтыр­тыла, һәр ерҙә сүп-сар һауыттары өсөн махсус майҙан­сыҡтар бул­дырылған, элекке һымаҡ сүп-сарҙы кәртә артына сығарып түгеү юҡ.

Азамат Муса улының баш­ланғысы менән мәктәп урамында, ауыл советы бинаһы тирәләй шыршы ағастары ултыртылған, ҡойма-кәртәләр яңыртылған. Былтыр Иҫке Бәпес ауылында уның етәкселегендә төҙөлгән иман йорто – мәсет асылған. Һанай китһәң, ошо дүрт-биш йыл эсендә биләмәлә әллә күпме эш башҡарылған.

Күптән түгел мин ул ауылға барып килдем, дөрөҫөрәге Азамат энекәш саҡырҙы. Баҡтиһәң, улар Иҫке Бәпес ауылына ар­налған китап сығарырға йөрөйҙәр икән, ҡулъяҙмалары әҙер, мөхәр­рирләүҙе һоранылар. Әлбиттә, мин ризалаштым, нисек инде Малай ауылының “һыңар тәртә” тип йөрөтөлгән урамында бергә үҫкән күршегә ярҙамлашмайһың!

Башҡортостан Респуб­лика­һының атҡаҙанған мәҙәниәт хеҙ­мәткәре Азамат Ғәйфуллин то­тонғас, Иҫке Бәпес ауылы халҡы был яуаплы, әммә сауаплы эште лә уңышлы атҡарып сығыр, тим!

 

Фәнил ҠОҘАҠАЕВ.

 

Ҡырмыҫҡалы районы.

Читайте нас в