Геройҙарға наградалар тапшырылды

Был премияны 2004 йылда Өфө хакимиәте һәм "Вся Уфа" телеканалының продюсерҙар үҙәге булдырғайны. Яңылыҡтар, мәғлүмәт тапшырыуҙарын әҙерләүселәр һәм ҡатнашыусылар – изге эштәр ҡылған, ҡаршылыҡтарҙы еңеп сыҡҡан, батырлыҡ күрһәткән, спорт рекордтары ҡуйған, асыш яһаған кешеләр премия лауреаттары була. 

2020 йылда проект Милли телерадиотапшырыуҙар ассоциацияһы булышлығында федераль кимәлгә сыҡты, ә 2022 йылда халыҡ-ара сараға әйләнде. 

Еңеүселәрҙе ҡотлап сығыш яһағанда Радий Хәбиров:

– Ойоштороусыларға ысын күңелдән рәхмәт әйтәм һәм шундай тәҡдим дә индерәм: киләсәктә бөгөнгө геройҙарҙың артабанғы яҙмышы тураһында ла һөйләргә. Улар – беҙҙең янда йәшәгән ябай кешеләр, әммә ҡатмарлы хәлдәр килеп тыуғанда улар үҙҙәренең иң яҡшы сифаттарын аса. Бөгөн улар кемгәлер ярҙам иткән, ә икенсе юлы үҙҙәренә ярҙам кәрәгеүе ихтимал, – тине ул. – Бөгөн Донбассты, беҙҙең граждандарҙы яҡлаусылар ҙа ысын геройға әйләнде. Минең өсөн беҙҙең заман геройы – Украинала махсус операция үткәреү тураһында ҡатмарлы ҡарарҙы ҡабул иткән илебеҙ етәксеһе Владимир Владимирович Путин. Беҙ барыбыҙ ҙа ошо курсты хуплайбыҙ. 

Республика Башлығы премияның төп номинацияһының дипломдарын, бронза статуэткаларын Костромала йәшәгән Станислав Смирнов, Джамал Гассоян, Иван Потёминға тапшырҙы. Улар 3-сө ҡатта йәшәгән балаларҙы янғындан ҡотҡарған. Ваҡиғала ҡатнашҡан тағы бер герой - Украинала булған сержант Кирилл Никитин әле дауаханала ята, шуға ла тантанаға килә алмаған. Госпиталгә наградаһын килтергәс, "Русь" өлкә телекомпанияһы уның хаҡында айырым сюжет эшләйәсәк.

 Мәғлүмәт, фото: Башҡортостан Башлығы сайтынан.