Хәрби ветеринарҙар батырлығы ла онотолмай

112-се Башҡорт кавалерия дивизияһының 275 кавалерия полкы хәрби ветеринар табибы Мансур Баһаутдинов ике тапҡыр "Ҡыҙыл йондоҙ" ордены менән бүләкләнә. Башҡортостан юлдаш телеканалында Бөйөк Еңеү көнөнә арналған телемарафонда дивизияның ветеринарҙар хеҙмәте тураһында бер нисә уникаль мәғлүмәт еткерелде. Башҡортостан Республикаһы  Милли архивының бүлек етәксеһе Зөлфәр Ғәтиәтуллин бығаса бер ҡайҙа яҡтыртылмаған архив документтарын күрһәтте.

Мансур Багдан улы Баһаутдинов Бөйөк Ватан һуғышы башланғанда байтаҡ тәжрибә туплаған ветеринар була. 112-се Башҡорт кавалерия дивизияһы ойошторолғас, 275-се кавалерия полкы аттарын ҡарауҙы уға йөкмәтәләр. Эшенә яуаплы  ветеринар полк аттарын тейешле тәртиптә тотҡаны  өсөн бер нисә тапҡыр командование тарафынан билдәләнә, 500-ҙән артыҡ яралы атты тылға оҙатыуҙы тейешле кимәлдә  ойоштора, бихисап яралы малдарҙы  ҡабаттан сафҡа баҫтыра.

Ветеринар-яугир Мансур Баһаутдинов яуҙа күрһәткән ҡаһарманлығы өсөн ике тапҡыр "Ҡыҙыл йондоҙ" орденына лайыҡ була.

Бөйөк Ватан һуғышында хәрби ветеринария хеҙмәтенең дә роле баһалап бөткөһөҙ ҙур була. Ветеринарҙар үҙҙәренең ғүмерен хәүеф аҫтына ҡуйып,  фронт аттарын ҡотҡарған осраҡтар билдәле.  Улар яралы аттарҙы дауалап сафҡа ҡайтарып ҡына ҡалмай, фронтта төрлө ауырыуҙарҙы булдырмау   йәһәтенән  хәлде лә ныҡлы контролдә тота. Бөйөк Ватан һуғышы йылдарында Ҡыҙыл Армияның ете  меңдән ашыу хәрби ветеринар табибы дәүләт наградаһына лайыҡ була.

Фото: Башинформ.