Бөтә яңылыҡтар
Йәмғиәт
14 Май , 22:57

Яңы мәктәп төҙөлә

tut-magaz.ru
Фото:tut-magaz.ru

Рәсәй Фәндәр академияһы Өфө федераль тикшеренеүҙәр үҙәгенең Тарих, тел һәм әҙәбиәт институты директоры Зөһрә Рәхмәтуллина социаль селтәрҙәге сәхифәһендә ҡыуаныслы яңылыҡ менән уртаҡлашты.

“Экс-министрҙар, айырыу­са мәғарифта, бер ҡасан да булмай. Миңә күп милләтле ҙур республиканың хатта ике тапҡыр “төп уҡытыусыһы” булыу бәхете тейҙе. Баш­ҡортостандың мәғариф өлкә­һе – округта һәм илдә иң ҙур, йылдам үҫкән тармаҡ­тарҙың береһе. Республикала мәктәп төҙөлөштәренең әүҙем барыуы һөҙөмтәһендә балаларҙы, ата-әсәләрҙе, уҡытыусы­ларҙы һәм, әлбиттә, элекке мәғариф министрҙарын ҡыуан­дырып, йыл һайын белем биреү учреждениелары реконструкциялана, яңылары асыла.

Һәм бына йәнә яҡшы хә­бәр! Өфө ҡалаһының Киров районындағы йәш һәм әүҙем төҙөлгән биҫтәләрҙең бере­һендә, Кузнецов затонында, баш ҡаланың 450 йыллығына (2024 йылда) өр-яңы, заманса мәктәп төҙөлә. Бында йәш ғаиләләр, мәктәпкәсә һәм мәктәп йәшендәге балалар байтаҡ, әле ата-әсәләрҙең күбеһе сабыйҙарын алыҫтағы төрлө мәктәптәргә йөрөтөргә мәж­бүр. Бәхеткә күрә, тиҙҙән бында мәктәп асыласаҡ – “Көньяҡ ҡапҡа” биләмәһендә ком­плекс­лы төҙөлөш алып ба­рыуға ярашлы, ғәйәт ҙур участ­ка бүленгән. Ул бер нисә бинанан – башланғыс һәм өлкән кластар өсөн дүрт ҡатлы уҡыу корпустарынан, ашхананан һәм тамаша залынан, бер һәм ике ҡатлы спорт блогынан һәм хужалыҡ бинаһынан торған комплекслы белем биреү үҙәген тәш­кил итәсәк. Спорт менән шө­ғөлләнеү өсөн футбол майҙа­ны, йүгереү юлдары, баскетбол, еңел атлетика, волейбол, өҫтәл теннисы, I–IV һәм V–IX кластар өсөн хәрәкәтле уйын, IX–XI кластар өсөн тыныс ял майҙан­сыҡтары һәм башҡалар булдырыла. Тотош мәктәп ҡаласығы үҫеп сыға!

Кузнецов затонында дуҫтарым, элекке студенттарым, таныштарым йәшәй. Һәм яңы мәктәп биҫтәлә йә­шәгән өлкәндәргә лә, йәш­тәргә лә республиканың ысын юбилей бүләге буласаҡ.

Мәғлүм булыуынса, Баш­ҡортостан Хөкүмәте бойороғо менән мәктәп капиталь төҙө­лөш объекттары исемлегенә индерелгән”, – тип яҙған ул.

 

Л. ДӘҮЛИЕВА әҙерләне.

Читайте нас в