Һөнәренә урау юлдар аша килә

Һәр кешенең һөнәр һайлау тарихы бар. Берәүҙәр бәләкәйҙән хыяллана, икенселәр ата-әсәһенең кәңәшен тыңлай, өсөнсөләр дуҫтарына эйәрә. Ишембай районындағы Биксән дөйөм белем биреү усағының мәктәпкәсә төркөм тәрбиәсеһе Рәғиҙә Ғәлимйән ҡыҙы Таһирова үҙенең һөнәренә бер аҙ урау юлдар аша килһә лә, хеҙмәте менән бик тә бәхетле кеше.

Ә бына уҡытыу-тәрбиә эшенә ҡыҙыҡһыныуы мәктәптә уҡыған йылдарында уҡ ярала.

– Уҡытыусыларға гел һоҡлан­дым. Уларҙың ғәҙел, алсаҡ булыуы, матур итеп кейенеүе, үҙҙәрен тотошо арбай ине. Баштан килеп һыйпаһалар, күңел үҫеп китә. Бик матур хәтирәләр һаҡлай мәктәп йылдарым. Һәр ваҡыт юлымда яҡшы уҡытыусылар ғына осра­ғанғамы, “Их, улар кеүек булһаң икән!” тип уйлай торғайным, – тигән хәтерләүҙәрҙән башланып китте  әңгәмәбеҙ.

Уҡытыусы һөнәренә ғашиҡ булып үҫһә лә, өлкән кластарҙа фекере ҡырҡа үҙгәреп, Башҡортостан дәүләт аграр университетының агрономия факультетына уҡырға инә ул. Уны тамамлағандан һуң “Коммунар” колхозына ҡайтып эш башлай. Колхоздарҙың тарҡалыуы һөнәрен үҙгәртеүгә булышлыҡ итә. Бала саҡтан күңеленә уйылған уҡытыусы булыу хыялы ла һүрелмәгән була әле.

Тап шул осорҙа Биксәндә балалар баҡсаһы асылыуы тураһында һүҙ ҡуҙғатыла, ә уның мөдире вазифаһын тап Рәғиҙә Ғәлимйән ҡыҙына тәҡдим итәләр.

– Булдыра алырмынмы тигән икеләнеү күңелемдә булманы. Шунда уҡ ризалаштым. Ситтән тороп Стәрлетамаҡ дәүләт педагогия институтына уҡырға индем һәм ең һыҙғанып эшләп алып киттем, – тип ул ваҡыттағы ҡарарына һис кенә үкенмәй.

1993 йылда 30 йәшлек сағында ошондай яуаплы вазифаны үҙ иңенә ала Рәғиҙә Ғәлимйән ҡыҙы.

– Мин шул тиклем балаларҙы яратам. Ял көндәрендә лә уларҙы һағынып өлгөрәм. Балаларҙың да килеп инеү менән ҡосаҡлап алыуы күңелемде ҡанатландырып ебәрә. Ата-әсәләргә ҡәҙерле сабыйҙарын ышанып тапшырыуҙарына ҙур рәхмәт. Ғөмүмән, беҙҙә ата-әсәләр ҙә бик әүҙем, саралар уларҙың ҡатнашлығынан тыш үтмәй. Спорт ярыштары булһынмы, конкурс йә концертмы – барыһында ла ата-әсәләр ярҙамын тоябыҙ, – тип һәр яҡлап эшенән ҡәнәғәт булыуын белдерҙе әңгәмәсем.

Мәктәптәге, ауылдағы саралар­ҙан ғына түгел, район кимәлендәге төрлө конкурстарҙан да ситтә ҡалмай бәләкәстәр һәм уңыштары менән һөйөндөрөп тора. Мәҫәлән, “Һаумы, һаумы, әкиәт!” конкурсында беренсе урын яулағандар.

Туған телебеҙҙе, йолалары­быҙҙы өйрәтеүгә лә иғтибар ҙур. Ошо маҡсатта халҡыбыҙҙың көнкүрешен сағылдырған күркәм генә мөйөш тә булдырылған. “Ҡарға бутҡаһы” , “Һабантуй” кеүек байрамдар ойоштороу ҙа йәш быуынға йолаларыбыҙҙы тәрә­нерәк белергә  ярҙам итә.

2011 йылда мәктәп менән балалар баҡсаһы берләштерелә. Ошо ваҡыттан Рәғиҙә Ғәлимйән ҡыҙы тәрбиәсе булып хеҙмәт итә. Мәктәп менән балалар баҡсаһының бер бинала урынлашыуы, үҙ-ара тығыҙ бәйләнештә эшләүҙәре уҡыу һәм тәрбиә һөҙөмтәһен күтәреүгә лә булышлыҡ итмәй ҡалмай.

Эштең асылын белмәгәндә, тәрбиәсенең хеҙмәте артыҡ ауыр түгел һымаҡ, ләкин ысынында улар иңенә һалынған бурыс үтә лә яуап­лы.

– Ситтән ҡарағанда, эшебеҙ еңел һымаҡтыр. Кәрәк саҡта, балалар менән уйнайбыҙ ҙа, йыр­лайбыҙ ҙа, шаяртып та алабыҙ, ләкин яуаплылыҡ ҙур. Мәктәпкәсә йәштә баланың психикаһы бик тә һығылмалы. Уға ниндәй йүнәлеш бирәһең, шул яҡҡа борола. Тап ошо мәлдә уның күңеленә асҡыс таба белергә, изгелек орлоҡтары сәсеп өлгөрөргә кәрәк. Һәр бала үҙенсәлекле, һәр береһенең үҙенең һәләте бар. Холоҡтары ла төрлөсә. Минең килеп сыҡмай, тип үҙҙә­ренең көсөнә бик ышанма­ғандар­ҙың күңелен үҫтереп, ышаныстарын арттырыу ҙа – тәрбиәсенең бурысы, – ти ул.

Егерме туғыҙ йыл балалар баҡсаһында хеҙмәт иткән Рәғиҙә Ғәлимйән ҡыҙының эшен төрлө маҡтау ҡағыҙҙары биҙәй. Ул Рәсәй Федерацияһы Мәғариф министр­лығының Почет грамотаһы менән бүләкләнгән, Башҡортостан Рес­пуб­ли­каһының мәғариф отличнигы ла.

– Эшемә иң ҙур баһа – ата-әсәйҙәрҙең рәхмәте, сабыйҙарҙың ашҡынып балалар баҡсаһына килеүе. Инде уларға өйрәнеп бөтһәм, мәктәпкә китергә ваҡыт­тары етә. Улар менән айырылышыу ҙа еңел түгел. Бер бинала булғас, тәнәфестә үҙҙәре лә йүгереп килеп етә. Күҙ алдында шулай ҙураялар, – тип йылмая Рәғиҙә Таһирова.

30 йылға яҡын тәрбиәсе булып эшләү дәүерендә ҡасандыр  балалар баҡсаһына йөрөгән тәрбиәләнеүселәре лә үҫеп, ғаилә ҡороп, хәҙер инде үҙҙәренең балаларын “Беҙҙе ҡараған һымаҡ итеп тәрбиәләгеҙ” тип Рәғиҙә Ғәлимйән ҡыҙына килтерә.

Үҙ эшенә намыҫ менән ҡараған хеҙмәткәрҙе башҡа яуаплы сараларға ла йәлеп итәләр. Хәҙер 30 йылдан ашыу ул участка һайлау комиссияһында секретарь булып эшләй. Ышанып тапшырғас, уны ла тырышып башҡарам, ти ул.

Кешеләргә кәрәкле булыу, хеҙмәтең менән файҙа килтереү генә түгел, унан тәм табып йәшәү бәхетенә эйә Рәғиҙә Ғәлимйән ҡыҙы. Тап уның кеүек шәхестәр киләсәк быуыныбыҙҙың тәрбиәле, маҡсатлы булып үҫеүен хәстәрләй. Оло тормошҡа тәпәй баҫырға өйрәткән сабыйҙарығыҙҙың рәхмә­тенән йөҙөгөҙ һәр ваҡыт әлегеләй балҡып торһа ине, Рәғиҙә апай!

Резеда ШӘҢГӘРӘЕВА.

Ишембай районы.