Бүздәктәр дзюдосылар тәрбиәләй

Бөгөн Бүздәк ауылында тыуып үҫкән яугир-интернационалсы Рәмил Шәйхетдинов иҫтәлегенә арналған республика дзюдо турниры үтте. Ярышта республиканың 13 районынан һәм ҡалаларынан спортсылар ҡатнашты: Өфө, Күмертау, Туймазы, Стәрлетамаҡ, Дүртөйлө, Бүздәк, Өфө, Шишмә, Әлшәй, Ғафури, Бәләбәй һәм Шаран.

Турнирҙы асыу тантанаһында митингта ҡатнашыусылар һалдат-интернационалсыларға арналған таҡтаташҡа сәскә һалды.

Бүздәк районының социаль һәм кадрҙар мәсьәләләре буйынса хакимиәт башлығы урынбаҫары Гөлфиә Ғабдрафиҡова, Бүздәк һәм Благовар райондары хәрби комиссары урынбаҫары Фауадис Мусин сәләмләү телмәре менән сығыш яһаны.

Сараны ойоштороусылар – республиканың Спорт министрлығы, район хакимиәте, Башҡортостандың Дзюдо федерацияһы, Бүздәк районының «Хәрби туғанлыҡ» йәмәғәт ойошмалары, һауа-десант ғәскәрҙәре ветерандары, сик буйы ғәскәрҙәре ветерандары, эшҡыуарҙар Илдар Вәлиуллин, Марс Хәбибрахманов, КФХ Хажиев, «Фрегат» яуаплылығы сикләнгән йәмғиәте.

Спортсыларҙы турнирҙың почетлы ҡунаҡтары ҡаршы алды: Башҡортостан Республикаһының дзюдо федерацияһы президенты Владимир Кузнецов, Бүздәк районының балалар-үҫмерҙәр спорт мәктәбе тәрбиәләнеүселәре, Башҡортостан Республикаһы чемпиондары, дзюдо буйынса Рәсәй спорт мастерҙары Рафаэль Вәлиуллин һәм Мәрйәм Хисамова-Сәмиғуллина, шулай уҡ Рәмил Шәйхетдиновтың класташтары Илдар Хажиев һәм Илдар Вәлиуллин.

Көнө буйы ныҡышмалы көрәш барҙы. Ярыш һөҙөмтәләре буйынса Бүздәк районы спортсылары үҙҙәренең ауырлыҡ һәм йәш төркөмдәрендә буйынса призлы урындар алды: Миләүшә Мансурова — 3-сө урын, Зарина Ғизәтуллина — 2-се урын, Илиза Заһиҙуллина — 2-се урын, Сафира Сәғитова — 1-се урын, Динар Ғималов — 1-се урын. Премия лауреаттары һәм бүләкләнеүселәр миҙалдар, дипломдар һәм иҫтәлекле бүләктәр алды. Шулай уҡ Ангелина Хөсәйенова, Сафира Сәғитова һәм Динар Ғималов маҡтау ҡағыҙҙары менән бүләкләнде.

Рәмил Рәшит улы Шәйхетдинов 1964 йылдың 24 мартында Бүздәк ауылында тыуған. Бала саҡтан спорт һәм физик культура менән мауыға. Еңел атлетика, футбол һәм волейбол буйынса ярыштарҙа мәктәп, район намыҫын яҡлай. Күп яҡлы спорт төрҙәрендә тиҫтерҙәре араһында иң шәбе, тәртипле, тыйнаҡ, яҡшы уҡыусы була. Балашов юғары хәрби авиация осоусылар мәктәбен тамамлай.

Афғанстанда хәрби бурысын үтәй. Ҡыҙыл Йондоҙ ордены, «Рәхмәтле афған халҡынан һалдат-интернационалсыға» миҙалы менән бүләкләнә. 24 йәшендә хәрби заданиены үтәгәндә һәләк була.

Бүздәк ауылындағы 2-се урта дөйөм белем биреү мәктәбе бинаһында Рәмил Рәшит улы Шәйхетдинов иҫтәлегенә мемориаль таҡтаташ ҡуйылған, Бүздәк ауылының урамдарының береһе уның исемен йөрөтә.

Фотолар Бүздәк районы хакимиәте сайтынан алынды.