Ленин паркына ниндәй үҙгәрештәр кәрәк?

Бөгөн Киров районындағы Ленин исемендәге паркта капиталь ремонтлау проекты буйынса сираттағы осрашыу-фекер алышыу үтте. Унда спорт ойошмалары вәкилдәре ҡатнашты.

Йыйылған кешеләрҙе паркты капиталь ремонтлау проекты менән тулыраҡ “Генпроект” яуаплылығы сикләнгән йәмғиәте вәкиле Людмила Стадничук таныштырҙы. Атап әйткәндә, ул паркта урынлашҡан мемориалдарҙың, шулай уҡ йәшел үҫентеләрҙең һаҡланасағын әйтте. Шулай уҡ бында алма баҡсаһы һәм күп функциялы майҙансыҡ буласаҡ.

Осрашыуҙа спорт йәмәғәтселеге вәкилдәре үҙ тәҡдимдәрен индерҙе. Мәҫәлән, воркаут комплексын ябай турник һәм бурсаға алмаштырырға, йә береһен икенсеһенә тулыландырырға тәҡдим ителде. Бынан тыш, тәҡдимдәр араһында – роликтарҙа йәки скейтбордтарҙа шыуырға яратыусыларға ҡулланыу өсөн архитектура формаларын яраҡлаштырыу һәм, дөйөм алғанда, спорт объекттарына ҙурыраҡ иғтибар бүлеү.

– Ленин паркы физкультура һәм спорт менән шөғөлләнеүҙә, мәҫәлән, студенттар өсөн әүҙем ҡулланыла, – тине билдәле спорт функционеры Владислав Литвинчук. – Минеңсә, быға иғтибар итмәү дөрөҫ булмаҫ ине.

Теләгән һәр кем үҙҙәрен ҡыҙыҡһындырған һорауҙарҙы биреп, тәҡдимдәрен еткерә алды.

Ленин исемендәге парк бай тарихҡа эйә. Паркка Софья аллеяһы, Зыя Нуриев исемендәге сквер, Ленин урамының йәйәүлеләр зонаһы һәм АртТерия аллеяһы, шулай уҡ Дәүләт Йыйылышы йорто скверы йәнәш килә.

Фото: Киров районының "Бәйләнештә"ге төркөмө.