Иртәгәһе көнгә ышанысты арттырып...

Башҡортостан Хөкүмәтенән хәбәр итеүҙәренсә, 30 июндә Өфөлә республика Башлығы Радий Хәбиров һәм Рәсәйҙең Бойондороҡһоҙ профсоюздар федерацияһы рәйесе Михаил Шмаков төбәк Профсоюздар федерацияһының 100 йыллығы уңайынан юбилей сараһында ҡатнашты. Тантана "Башҡортостан" дәүләт концерт залында үтте.

Сара башланыр алдынан Радий Хәбиров менән Михаил Шмаков төбәктең профсоюз хәрәкәте тарихынан архив документтары күргәҙмәһен ҡараны. Бында, атап әйткәндә, 1922 йылдың 2-6 июлендә үткән Бөтә башҡорт профсоюздары съезының протоколы бирелгән. Унда Өфө губернаһы менән Бәләкәй Башҡортостан союз-ара органдары берләшә һәм берҙәм Башҡортостан өлкә профсоюздар советы ойошторола. Республика Профсоюздар федерацияһының тарихы нәҡ ошо ваҡиғанан башлана.

Һуңынан Радий Хәбиров менән Михаил Шмаков Профсоюздар федерацияһының 100 йыллығына арналған почта продукцияһын күрһәтеүҙә ҡатнашты. Конвертта һәм махсус келәймәлә - юбилей логотибын, ә почта карточкаһында Өфөләге Профсоюздар йортон һүрәтләнеләр.

Тантаналы йыйылышта Башҡортостан Башлығы Радий Хәбиров республиканың профсоюз активистарын юбилей менән ҡотланы, уларҙың республиканың социаль-иҡтисади үҫешенә индергән өлөшөнөң мөһимлеген билдәләне һәм дәүләт наградалары тапшырҙы.

"Хөрмәтле Михаил Викторович! Хөрмәтле республика Профсоюздар федерацияһы хеҙмәткәрҙәре һәм ветерандары! Хөрмәтле дуҫтар! Ихлас күңелдән барығыҙҙы ла республикабыҙҙың профсоюз хәрәкәтенә 100 йыл тулыу менән ҡотлайым. Хөрмәтле Михаил Викторович, Рәсәй төбәктәренән һәм яҡын сит илдәрҙән ҡәҙерле ҡунаҡтарыбыҙ, ошондай иҫтәлекле дата уңайынан байрам шатлығыбыҙҙы уртаҡлашырға килгәнегеҙ өсөн рәхмәт!

Профсоюздар һәр саҡ ҙур татыу ғаилә булды. Эшселәрҙең хоҡуҡтары өсөн көрәшәһегеҙ. Һәр кемгә хеҙмәт һәм ял итеү өсөн лайыҡлы шарттар булдырыу яҡлыһығыҙ. Барлыҡ кешенең дә иртәгәһе көнгә ышанысы булһын өсөн.

Профсоюз ойошмалары республика һәм ил тарихына сағыу биттәрен - Бөйөк Ватан һуғышы йылдарында хәрби һәм хеҙмәт батырлығын, һуғыштан һуң иҡтисадты тергеҙеүҙе, төбәгебеҙ сәнәғәтен, социаль өлкәһен үҫтереүҙе яҙып алды. Республика Профсоюздар федерацияһы үҫешенә Аршат Сабит улы Ихсанов, Әмирхан Мирҡәҙәм улы Сәмерханов һәм башҡа етәкселәр ҙур өлөш индерҙе. Күп йыллыҡ хеҙмәтегеҙ, һоҡланғыс традициялар өсөн профсоюз хәрәкәте ветерандарына оло рәхмәтебеҙҙе белдерәбеҙ.

Бөгөн республиканың Профсоюздар федерацияһы ярты миллионға яҡын кешене берләштерә. Һеҙ хеҙмәт кешеләренең мәнфәғәттәрен яҡлаусы иң ҙур һәм ҡеүәтле ойошма булып ҡалаһығыҙ. Йәмғиәтебеҙҙе алға этәрәһегеҙ. Иҡтисад тармаҡтарын һәм социаль өлкәне үҫтереү өсөн мөһим стимул булдырығыҙ. Эш хаҡын "күләгә"нән сығарырға, уның үҫешенә өлгәшергә, бурыс булдырмаҫҡа ярҙам итәһегеҙ. Эшсе һөнәрҙәрҙең абруйын арттырыуға булышлыҡ ҡылаһығыҙ.

Хөрмәтле дуҫтар! Беҙ быйыл республикала Һөнәри белем биреүҙе, лайыҡлы хеҙмәт шарттарын һәм хеҙмәт династияларын яңыртыу йылы тип иғлан иттек. Бының менән хеҙмәт кешеһе мәнфәғәттәренең республика өсөн айырыуса мөһим булыуын билдәләйбеҙ. Исемле йыл республика профсоюз хәрәкәте үҫешенә яңы этәргес бирер тип ышанам.

Башҡортостан Профсоюздар федерацияһы артабан да хеҙмәт кешеләренең мәнфәғәттәрен уңышлы яҡлар, иҡтисадты һәм йәмәғәт тотороҡлолоғон нығытыуға булышлыҡ итер, тип ышанам. Байрам менән, ҡәҙерле дуҫтар!"

Рәсәйҙең Бойондороҡһоҙ профсоюздар федерацияһы рәйесе Михаил Шмаков Башҡортостандан хеҙмәттәштәрен бер быуатлыҡ юбилей менән ҡотланы.

"Хөрмәтле туғандар! Башҡортостан Профсоюздар федерацияһының күркәм юбилейы менән ихлас ҡотлайым! 100 йыл - һәйбәт эшләгән ойошма өсөн ныҡлы дата, - тине Михаил Шмаков. - Республика профсоюздары эшселәрҙең һәм хеҙмәткәрҙәрҙең хоҡуҡтарын уңышлы яҡлай, хеҙмәтте һаҡлауҙы, хәүефһеҙлек техникаһын иғтибар менән күҙәтә. Артабан да шулай булыр тип ышанам. Рәсәй Бойондороҡһоҙ профсоюздар федерацияһы менән берлектә һеҙ ил иҡтисадын үҫтерәһегеҙ. Байрам менән, дуҫтар!"

"Мин үҙем - профсоюз ағзаһы. Үрнәк күрһәтергә кәрәк. Был бик мөһим һәм кәрәкле, - тине Радий Хәбиров, юбилей сараһын тамамлап. - Профсоюздар - хеҙмәтсәндәр хоҡуғын яҡлаусы етди йәмәғәт структураһы. Бөгөн, юбилей көнөндә, беҙ уларға рәхмәт белдерәбеҙ, ҡотлайбыҙ, хеҙмәттәшлекте артабан да дауам итергә теләйбеҙ".

Фото: glavarb.ru