Бөтәһе 291 проект грантҡа дәғүә итә

30 июндә коммерцияға ҡарамаған ойошмаларға граждандар йәмғиәте институттарын үҫтереү өсөн республика Башлығы гранттарының икенсе конкурсына ғаризалар ҡабул итеү тамамланды.

Ғаризаларҙы 2022 йылдың 1 июненән 30-на тиклем Башҡортостан Республикаһы Башлығы гранттары фонды ҡабул итте.

Конкурсҡа коммерцияға ҡарамаған ойошмаларҙан бөтәһе 291 проект бирелгән.

Конкурстың дөйөм бюджеты 101,5 миллион һум тәшкил итә, ул өлөшләтә Президент гранттары фонды тарафынан финанслана. Конкурсанттарҙың барлыҡ проекттарының суммаһы 448 миллион һумдан ашыу тәшкил итте.

Республика муниципалитеттары араһында ғаризалар һаны буйынса Өфө (153 ғариза), Ғафури районы (13), Стәрлетамаҡ (11) алда бара.

Иң күп заявкалар түбәндәге йүнәлештәр буйынса бирелгән:

- мәҙәниәт, сәнғәт, тарихи хәтерҙе һаҡлау (90 ғариза);

- граждандарҙың айырым категорияларын социаль хеҙмәтләндереү, социаль ярҙам һәм яҡлау (48 ғариза);

- һаулыҡ һаҡлау, сәләмәт йәшәү рәүешен, физик культураны һәм спортты пропагандалау (44 ғариза).

Әлеге ваҡытта фонд ҡатнашыусыларҙан алынған ғаризаларҙың конкурс талаптарына тап килеү-килмәүен тикшерә.

Еңеүселәр август аҙағына билдәле буласаҡ. Мәғлүмәт грантыглавы102.рф сайтында баҫыласаҡ.

Башҡортостан Республикаһы Башлығы гранттарына киләһе конкурс 2022 йылдың 11 июлендә башлана. Конкурс йәштәр сәйәсәте өлкәһендәге проекттарға ярҙам итеүгә йүнәлтеләсәк. Дөйөм бюджеты 20 миллион һум тәшкил итәсәк.

Конкурстың положениеһы, проекттарҙың йүнәлештәре һәм тематикаһы, ҡатнашыусыларға талаптар, гранттарҙы тапшырыу шарттары һәм тәртибе тураһында тулыраҡ мәғлүмәт менән рәсми сайтта, “Документтар” бүлегендә танышырға мөмкин.

Фото: "Башинформ".