Луганскиға туғыҙынсы ылау оҙатылды

Луганск Халыҡ Республикаһына Башҡортостандан яңы гуманитар ярҙам оҙатылды. Был колонна Миңлеғәле Шайморатов исемендәге 22-се мәктәпкә тәғәйенләнгән.

Колонна ете автофургондан тора. Унда 76 тонна төҙөлөш материалдары һәм капиталь төҙөкләндереү өсөн кәрәк-яраҡ һалынған.

Йөктө оҙатыу тантанаһында Башҡортостандың Дәүләт Йыйылышы - Ҡоролтай рәйесе урынбаҫары Рөстәм Әхмәҙинуров һәм Башҡортостандың Ғәҙәттән тыш хәлдәр буйынса дәүләт комитеты рәйесе Фәрит Ғүмәров ҡатнашты. "Әле был объектта яҡташтарыбыҙ - Өфө төҙөүселәре эш башланы, уларҙың һаны ошо көндәрҙә йөҙгә тиклем артасаҡ, мәктәпте төҙөкләндереүҙе 1 сентябргә тиклем тамамлау бурысы ҡуйылды. Киләһе аҙнала тағы ла төҙөлөш материалдары, уҡыу кластары өсөн мебель, ҡорамалдар алып барыу планлаштырыла. Төҙөкләндереүҙән һуң балалар заманса йыһазландырылған, компьютерлаштырылған кластарҙа уҡыясаҡ", — тине Фәрит Ғүмәров.

Донбасс халҡына гуманитар ярҙам Башҡортостан Башлығы Радий Хәбировтың ҡушыуы буйынса ебәрелә. Быға тиклем республиканан 18 ылау оҙатылғайны. Аҙыҡ-түлек, дарыуҙар, төҙөлөш материалдары, китаптар, уҡыу кәрәк-яраҡтары, тәү сиратта кәрәк булған әйберҙәргә өҫтөнлөк бирелә.

Фото: Башҡортостан Дәүләт Йыйылышы - Ҡоролтай.