Быйыл бал етерлек

Башҡорт ир-азаматын атһыҙ, ҡурайһыҙ, ҡымыҙһыҙ күҙ алдына килтереп булма­ған­дай, умартасылыҡтан айырып ҡарау ҙа мөмкин түгел. Халҡыбыҙҙың боронғо кә­септәренең береһе – ҡортсолоҡ менән шөғөлләнгәндәрҙе бөгөн һәр ауылда тиерлек осратырға мөмкин. Күптәр уға табышлы шөғөл итеп ҡараһа, икенселәр өсөн был – күңел талабы, үҙҙәре лә бал ҡорттары кеүек, умартасылыҡ серҙәрен өйрәнеүҙән туҡтамай.

Әбйәлил районында был өлкәгә иғтибар йылдан-йыл көсәйә. Үҙҙәренең төп эшенән тыш, күңел ҡушыуы буйынса мәшғүл бул­ғандарҙың артыуы районда ҡортсо­лоҡто үҫтереүгә тос өлөш индерә. Шундай уңған­дарҙың береһе Ринат Минһажев Салауат ауылында йәшәй. Бөгөн уның 20-нән ашыу умартаһы бар.

– Быйыл уңыш мул буласаҡ, бик матур итеп тәүге балды һығып та алдыҡ. Тәүҙә умар­таларым йорт янында ултырҙы, әле йү­кә урманына алып барҙыҡ, аҙаҡ кире ҡа­рабойҙай баҫыуы янына алып киләбеҙ. Бер йылда өс төрлө бал алыу мөмкинлеге бар, – ти тәжрибәле ҡортсо. – “Татлы” шө­ғөл булһа ла, ҡорт тотоуы еңелдән түгел. Күптәр умартасы һөнәренә еңел кәсеп тип ҡарай һәм тәрән яңылыша. Иртә таңдан тороп, кискә тиклем умарталар янынан ҡай­тып инмәгән саҡтар ҙа була. Әммә күңелгә яҡын шөғөл булғанғалыр, күрәһең, мин бал ҡорттары менән мәж килеп, киреһенсә, кинәнес алам һәм ял итәм. Балды аша­уы ғына рәхәт, ә уны етештереүе, ай-һай...

Мин бәләкәйҙән атайыма ҡорт ҡарашып, был эштең нескәлек­тәрен белеп үҫтем. Ҡортсолоҡ менән шөғөлләнеү нәҫелдән килә. Әле балаларым ярҙам итә, ҡатыным Эльвира Марс ҡыҙы – уң ҡулым.

Ринат Минһажев оҙаҡ йылдар мәктәптә балаларға физик тәрбиә дәрестәрен алып бара, йәш быуынды сәләмәт тормошто һәм спортты үҙ итергә өйрәтә. Уҡыусы­лары ла төрлө спорт ярыштарында оло еңеүҙәр яулай, ГТО нормативтарын уңышлы тапшыра. Ҡасандыр мәктәптәрҙә “Умартасы нигеҙ­ҙәре” уҡытылған саҡта директор ҙур ышаныс менән был дәрестәрҙе уға тапшырып ҡуя. “Уҡыусылар ғына түгел, ауыл халҡы ла был яңылыҡты бик йылы ҡабул итте. Ир-егеттәр кис көнө дәрестәр үткәреүҙе үтенгәс, уларға түләүле курс та ойошторғайныҡ”, – тип ул саҡтарҙы хәтергә алды әңгәмәсем.

Бал ҡорттары кеүек үҙҙәре лә егәрле булғанға, ҡортсоларҙың өҫтәленән шифалы һәм татлы ризыҡ өҙөлмәйҙер, күрәһең. Һәр хәлдә Ринат Нуриәхмәт улы тап шундай: нәҙекәйбилдәр кеүек уңған, һәр эштән йәм һәм тәм табып йәшәй, сәләмәт тормош алып бара.

-  Кәримә УСМАНОВА

Әбйәлил районы