Төҙөлөш дауам итә

Башҡортостандың Алданған өлөшсөләр хоҡуҡтарын яҡлау фонды 2023 йыл аҙағына тиклем оҙаҡ төҙөлгән 130 меңдән ашыу квадрат метр торлаҡты сафҡа индертәсәк. Быйыл 78 мең квадрат метр файҙаланыуға тапшырыласаҡ.

– Биләмәләр үҫеше федераль фонды механизмдары булышлығында сафҡа индерел­гән дүрт объект тапшырылған да инде. 364 кеше үҙ фатирын алды, – тип хәбәр итте Баш­ҡор­тостандың Алданған өлөш­сөләр хоҡуҡтарын яҡлау фон­ды­ның генераль директоры ва­зифаһын башҡа­рыусы Олег Солтанов.

Республиканың төҙөлөш һәм архитектура министры урын­баҫары Артем Ковшов һүҙҙәре­нә ҡарағанда, 2022 йылдың аҙа­ғына тиклем Өфөлә, Салауатта, Өфө, Ҡырмыҫ­ҡалы, Стәрлетамаҡ райондарында тағы 17 объектты сафҡа инде­реү планлаштырыла. Бер мең тирәһе ғаилә өй туйлаясаҡ. Федераль фонд ярҙамында төҙө­лөп бөтөп барған объекттарҙа әлеге ваҡытта ике мең тирәһе эшсе көс һала. Бынан тыш, төбәк фонды халыҡ менән дә эш алып бара. Төҙөлөштә өлөшләтә ҡатнашҡан ике мең­дән ашыу кеше 5,5 миллиард һумдан ашыу аҡса алған. Икенсе ярты йыллыҡта Биләмәләр үҫеше фондының күҙәтеү советында биш йорт өлөшсөлә­ренең хоҡуғы тергеҙеләсәк.

Әйткәндәй, Ағиҙел ҡалаһын­да Сәскәләр бульварын төҙөк­лән­дереү дауам итә. Былтыр был биләмә ағиҙелдәр тарафынан тауыш биреү юлы менән һайлап алынғайны. Раҫланған документтарға ярашлы, эштәр­ҙе “Уралспецстрой” ябыҡ акцио­нерҙар йәмғиә­те башҡара. Бында заманса яҡтыртыу буласаҡ, яңы тротуарҙар барлыҡҡа киләсәк. Эргәләге Руслан Холбан исемендәге 1-се мәктәптә акустик система ҡуйыласаҡ.

Сәскәләр бульварынан Комсомол бульварына тиклемге биләмә йәшеллән­дере­ләсәк. Төҙөкләндерелгән урында шулай уҡ видеокүҙәтеү ойошто­роласаҡ.

Октябрҙә эште тамамламаҡ­сылар. Ағиҙел ҡалаһы хакимиә­те башлығы Фәнис Ғилуанов белдереүенсә, Сәскәләр бульвары ҡалалағы тағы бер төҙөкләндерелгән урындарҙың береһенә әйләнәсәк.

Әйткәндәй, быйыл апрель-майҙа ойош­торолған Бөтә Рә­сәй төҙөкләндереү өсөн объект­тарҙы һайлау буйынса онлайн-тауыш биреүҙә “Сәскәләр бульварынан Еңеү паркына тиклемге скверҙы төҙөклән­дереү” проекты күберәк тауыш (1687) йыйҙы. Ҡалала йәшәгән халыҡ­тың әүҙемлеге ярҙамында 2023 йылда “Уңайлы ҡала мөхитен булдырыу” программаһына ярашлы Сәскәләр бульварынан Еңеү паркына тиклемге ара төҙөкләндереләсәк.

Айһылыу НИЗАМОВА