Тырыштарҙың баҡсаһы йыл да уңа!

Ишембай ҡалаһы эргәһендәге Смаҡай ауылында йәшәгән баҡсасы Фәүзиә Насирова һарымһаҡ һәм башҡа йәшелсәләр үҫтереү серҙәре менән бүлеште.

Фәүзиә апайҙы яҡташтары төрлө йәмәғәт эштәрендә әүҙем ҡатна­шыу­сы булараҡ ҡына түгел, оҫта баҡсасы итеп тә белә. Ғаиләһе менән бергәләп бигерәк тә һарым­һаҡты күпләп үҫтерәләр һәм йыл да унан мул уңыш алалар. Үҙҙәре лә ҡуллана, ҙур ғына өлөшө һатыуға ла китә.

– Хәҙер өс йыл инде һарым­һаҡ­тың төрлө сорттарын үҫтерә­беҙ. Был шөғөлдөң дә үҙ нескә­лектәре бар. Йыл да бер урынға сәсмәйбеҙ. Мәҫәлән, былтырғы урынға быйыл картуф ултырт­тыҡ. Ашлама ҡулланыу, түтәл­дәр­ҙе йомшартып, тәрбиәләп тороу яҡшы уңыш алырға ярҙам итә. Быйыл тәүҙә, һыуыҡ булыу сәбәпле, бер аҙ япраҡтары һар­ғайып тора ине, ямғыр яуғас, йәшәреп, һабаҡтары ла ҡалына­йып китте. Һарымһаҡҡа ихтыяж ҙур,таныштар ҙа белеп бөткән, өйҙән үк килеп алалар. Ете сутый ерҙә сәскәйнек, күптән түгел ҡа­ҙып алып, елләтергә ҡуйҙыҡ. Уңышы бик шәп булды. Һатып алырға теләүселәр алдан сират­ҡа ла яҙыла, хатта 6-7-шәр кило­грамға заказ бирәләр. Киләһе йыл уңыш күберәк булһын өсөн картуф урынына ултыртасаҡбыҙ. Октябрь баш­тарында уҡ был эште баш­ҡа­рып ҡуйырға ниәтләй­беҙ, сөнки көҙ­ҙән сәселгән һарымһаҡ эре була.

Ғөмүмән, быйыл баҡса өсөн һауа торошо яҡшы булды. Өс аҙна элек помидорҙарым да ныҡлап бешә башланы. Хатта ярты килограмға еткәндәре бар. Борос та һынатманы. Ҙурлығы буйынса сынаяҡ аҫтынан да кәм түгел. Һуған да ишелеп уңды, берәүһе уртаса 300 грамм тарта. Яңыраҡ картуфты тәмләп ҡара­ныҡ. Улары ла ҙур булып үҫкән, берәүһе 400 грамға етә. Үҙебеҙ­ҙән артҡанын баҙарға алып сығып һатып та файҙаһын күрер­гә тырышабыҙ. Уның да төрлө сорттарын үҫтерәбеҙ. Үҙебеҙгә оҡшағанын ҡалдырабыҙ, артабан яңы сорттар менән байытабыҙ. Ҡарағат уңышы ла матур булды. Уны йыл һайын яҡынса 120–130 килограмм йыйып алабыҙ, үҙебеҙгә лә етә, яртыһынан күбе­һе һатыуға китә. Тормош иптә­шем менән икебеҙ ҙә баҡса үҫте­рергә яра­табыҙ. Каникулға ейән-ейәнсәрҙәр ҡайта, улар ҙа эшкә өйрәнә. Үҙ ваҡытында тәрбиәләп торһаң, баҡсаңдан мул уңыш алып һөйөнәһең, ­– ти Фәүзиә апай.

Үҫтерелгән уңышты, йәшел тәмләткестәрҙе ҡышҡылыҡҡа әҙерләп тә өлгөрә уңған хужаби­кә. Ғәҙәттәге укроп, петрушка ғына түгел, хатта кесерткәнде лә кип­тереп ҡуя. Ҡышҡы һалҡын­дарҙа кесерткән ашы – танһыҡ ризыҡ.

Уңған хужабикәнең ихатаһы ла шау сәскә. Йәй буйы күҙҙең яуын алырлыҡ итеп ата улар, яҡшы кәйеф бүләк итә.

Август – үҫтерелгән уңышты ҡышҡылыҡҡа әҙерләү мәле. Был осор үҙе бер күңелле мәшәҡәт. Фәүзиә апай былтыр 400 банка төрлө ҡайнатма, йәшелсә турамаларын әҙерләгән булһа, әле ҡыярҙы ғына 40 банка тултырып ҡуйған. “Баҡсала үҫкән бер генә нәмәне лә әрәм итмәйбеҙ”, – ти уңған хужабикә.

-  Р. ӘХМӘТГӘРӘЕВА

Ишембай районы