Барыһы ла ҡәҙер-хөрмәткә лайыҡ

Ейәнсура тарих һәм тыуған яҡты өйрәнеү музейы үҙенең “Хазина” проектын уңышлы тормошҡа ашыра. Был проекттың төп маҡсаты – ауылдарҙа мәҙәни ҡомартҡыларыбыҙҙы пропагандалау, йәмәғәтселектең иғтибарын “һуғыш балалары” статусына эйә кешеләргә йүнәлтеү, һәр береһенең һөйләгәнен яҙып алып, тарих биттәрендә ҡалдырыу.

Ошо көндәрҙә Әбүләйес ауылы мәҙәниәт йортонда ойошторолған сара Халыҡ сәнғәте һәм Рәсәй халыҡтарының матди булмаған мәҙәни мираҫы йылына арналды. Беренсенән, ауылдың билдәле шахматсыһы Марс Бикбаев иҫтәле­генә шахмат турниры үткәрелһә, икенсенән, һуғыш осоро балалары Миңзифа Ағурҙина, Зөлхизә Киналиева, Миңнур Мусина, Фирҙәүес Назароваға ҡәҙер-хөрмәт күрһә­телде. Ошо тантаналы сара ауыл ағинәйҙәренең хәтерендә оҙаҡ һаҡланыр, күп йылдарға һәр бере­һенең күңелендә иҫтәлекле хәтирә булып ҡалыр, тип ышанабыҙ, сөнки кисәнең башынан аҙағынаса ошо апайҙар тамашасы­ларҙың иғтибар үҙәгендә булды. Ағинәйҙәр йылы ла, хисле лә ҡотлау һүҙҙәрен ишеткәндә хатта күҙ йәштәренә ирек ҡуйҙы, бала саҡтарындағы тормошҡа байҡау яһағанда ла тулҡынланыуын йәшермәне.

Ейәнсураның тарих һәм тыуған яҡты өйрәнеү музейы етәкселеге иһә ауыр һуғыш йылдарында күп­тәр кейгән аяҡ-кейемен – саба­та­ларҙы, халҡыбыҙҙың бүтән милли кейемдәрен алып килгәйне. Сара­ның хөрмәтле ҡунаҡтары булараҡ, нәҡ улар ошо кейемдә үҙҙәрен һуғыш осорондағы инәйҙәр кеүек хис итте, һағыштарҙы йырлап-бейеп таратты.

Әбүләйес ауыл биләмәһе хаки­миәте башлығы Хөрмәт Ҡотошов­тың ағинәйҙәрҙе “Һуғыш балалары” миҙалы менән бүләк­ләүе сараның иң тулҡынландырғыс мәле бул­ған­дыр. Ололарҙың ҡыуаныстан кү­ңел­дәре тулды, күҙҙәрендә шатлыҡ сатҡылары балҡыны, барыһы ла үҙҙәренә ҡарата шундай ихтирам булыуынан ғорурлыҡ кисерҙе.

Әбүләйес ауылының “Аҡсабикә” тип исемләнгән фольклор төркөмө ағинәйҙәрҙе үҙҙәренең репертуа­рындағы иң матур йырҙар менән сәләмләне, кисә аҙағында уларға байрам сәйе ойошторолдо.

Һүҙемде йомғаҡлап, шуны әйт­кем килә: сараны юғары кимәл­дә ойоштороуға булышлыҡ иткәндәре өсөн ауыл биләмәһе хакимиәте башлығы Х. Ҡотошовҡа, клубтың художество етәксеһе К. Имел­баеваға, китапханасы З. Мырҙа­бу­латоваға, шулай уҡ ирекмәндәр Р. Ағурҙинаға, Г. Имелбаеваға һәм С. Яубаҫароваға оло рәхмәтебеҙҙе еткерәбеҙ.

- Миҙхәт АҪЫЛБАЕВ

Ейәнсура районы