Красный Луч ҡалаһына 30-сы колонна юл тотто

Бөгөн Өфө районының "Башсельхозтехника" базаһы биләмәһенән Красный Луч ҡалаһына сираттағы гуманитар колонна ҡуҙғалды.

"Башҡортостан Луганск Халыҡ Республикаһына гуманитар ярҙам күрһәтеүен дауам итә. Бөгөнгө көнгә ҡарата ике мең тоннанан ашыу аҙыҡ-түлек, дарыуҙар, кейем-һалым, беренсел кәрәк-яраҡ, төҙөлөш материалдары һәм башҡа күп нәмә ебәрҙек инде. Бөгөн ғәҙәти йәшәү мөмкинлегенән мәхрүм кешеләрҙең иң киҫкен ихтыяждарын иҫәпкә алып ойошторолған гуманитар ярҙамдың 30-сы колоннаһын оҙатабыҙ. 18 кеше, дүрт фургон, оҙатып йөрөүсе өс машина бар", — тине Башҡортостан Хөкүмәте Премьер-министры урынбаҫары Ирек Сәғитов.

“Берҙәм Рәсәй" партияһының төбәк башҡарма комитеты етәксеһе Руслан Насретдинов автоколоннаның етәксеһе булараҡ юлланды. "Был ярҙам Луганск Халыҡ Республикаһының Красный Луч ҡалаһына тапшырыласаҡ. Гуманитар йөккә аҙыҡ-түлек һәм кәрәкле тауарҙар тупланған", — тине Руслан Насретдинов.

Фото "Берҙәм Рәсәй" партияһы сайтынан алынды.