Балды нисек һайларға?

Баҙарҙа балдың ниндәй генә төрө һатылмай: йүкә, ҡарабойҙай, көнбағыш, сәскәнән тиһеңме, кәрәҙлеме, солоҡтоҡомо...

Шулай ҙа ялған бал һатыусылар ҙа осрап ҡуя. Берәүҙәр тәбиғи продукция шыйыҡ булырға, икенселәр – кристаллашырға, йәғни шәкәр­ләнергә тейеш тип уйлай. Өсөн­сөләр, бал аҡ төҫтә булмай, ул шә­кәр ҡушҡанға ағара тиһә, бәғзе­ләр, аҡ бал – дауалай торған иң яҡшы ризыҡ, тиҙәр. Ысын балды нисек һайларға?

Яҡшы сифатлы балдың төп күрһәткесе – тамаҡты ҡамаштыра торған булыуы, телдә оҙаҡҡа ҡала торған тәме һәм, ауыҙға ҡапҡас, тиҙерәк һыу эске килеү тойғоһо. Әгәр банка төбөнә төпрә ултыра икән, был – насар бал.

Яңы айыртылған бал йәй аҙағы – көҙ башында шыйыҡ була.

Йүкә балы асыҡ һары төҫтә, көслө үҙенсәлекле еҫле. Шәкәр­ләнгәндә алтынһыу аҡһыл төҫкә инә. Аҡ акация балы иһә төҫһөҙ, һыу шикелле үтә күренмәле. Әкрен шәкәрләнә, оҙаҡ ваҡыт шыйыҡ килеш ҡала. Шәкәрләнгәндә ҡар кеүек ап-аҡ була. Ҡарабойҙай балы ҡа­ра-ҡыҙғылт төҫтә, үҙенсәлекле тәмле, шәкәрләнгәндә бутҡа һымаҡ массаға әүерелә. Бәпембә балы шыйыҡ, алтынһыу төҫтә, ләкин бик тиҙ шәкәрләнә.

Балды ағас һауытта һаҡларға кәңәш итәләр. Уны 37 градустан юғары йылытырға ярамай, артыҡ эҫелектән ул сифатын юғалта, тәме, төҫө һәм еҫе юғала.

Кәримә УСМАНОВА