Кеше хоҡуҡтарын яҡлай улар

 Баш ҡалабыҙҙа тантаналы шарттарҙа  республиканың йәмәғәт күҙәтеү комиссияһының алтынсы составтағы яңы һайланған ағзаларына мандаттар тапшырылды. Сараны төбәктең Йәмәғәт палатаһы рәйесе Азамат Йәнбирҙин алып барҙы.

 Йәмәғәт күҙәтеү комиссияһының яңы составы илдең 43 төбәгендә, шул иҫәптән Башҡортостанда ла булдырылған. Һайлау түбәндәгесә башҡарылған: барлыҡ теләгәндәр  тәғәйен  документтарҙы ебәргән,  артабан РФ Йәмәғәт палатаһы советы иң лайыҡлы кандидаттарҙы һайлаған. Һөҙөмтәлә, комиссияның 60 проценттан күберәге яңыртылған. Вәкәләт ваҡыты өс йыл тәшкил итә.

 Комиссияла билдәле йәмәғәт эшмәкәре, хоҡуҡ һаҡлаусы Олег Ғәлин етәкселегендә 18 кеше эшләйәсәк. Өҫтөнлөк табиптарға һәм юристарға бирелгән. Улар мәжбүри тотоу урындарында граждандарҙың медицина һәм башҡа хоҡуҡтарын үтәүҙе контролләүҙе көсәйтә ала. Күптән түгел  Өфөлә комиссияның яңы составының  тәүге ултырышы булып үтте.

 Әйтергә кәрәк, мандаттар тапшырыу тантанаһында Башҡортостан Хөкүмәте Премьер -министры урынбаҫары Ирек Сәғитов та ҡатнашты.

• Йәмәғәт күҙәтеү комиссияһының яңы составына һайлап алынған 18 кеше дәүләт власть органдарында, хоҡуҡ һаҡлау органдарында етди тикшереү үтте. Хәҙер уларға өс йыл дауамында республиканың мәжбүри тотоу урындарында хоҡуҡтарҙы яҡлау эше ышанып тапшырылған. Комиссия ағзаһы булырға тигән ҡарарҙы аңлы рәүештә, ауыр тормош хәлендә ҡалған кешеләргә ярҙам итеү теләге менән һайлағанһығыҙҙыр. Комиссия составына ҡарап та, дәүләт тарафынан һалынған бурыстарҙы сифатлы итеп башҡара алырығыҙҙы әйтергә мөмкин, -тине  Ирек Сәғитов.

Комиссия етәксеһе итеп һайланған Олег Ғәлиндың был өлкәлә бай эш тәжрибәһе булыуын билдәләне. Ул йәмәғәт күҙәтеү комиссияһының өсөнсө һәм дүртенсе составына ла етәкселек иткән. Шуға ла комиссияның яңы ағзаларын эш нескәлектәренә тиҙ өйрәтә алыуына ла шик юҡ.

• Комиссия быйыл июль айында формалаша башланы. Был ҡатмарлы процесс ине. Ысынлап та, етди тикшереүҙәр үттек. Кемдер үҙе китте, кемдер һайлауҙан үтмәне, һөҙөмтәлә, документ тапшырған 25 кешенең 18-е һайланды. Улар буш һәм буш булмаған ваҡыттарында ярҙамға мохтаждарға ярҙам итергә әҙер, - тине Олег Ғәлин.

Башҡортостандың Йәмәғәт палатаһы рәйесе Азамат Йәнбирҙин да комиссия ағзаларына йәмәғәт палатаһының һәр ваҡыт терәк буласағын белдерҙе. 

Башҡортостандың йәмәғәт күҙәтеү комиссияһы 2008 йылдың октябрендә булдырылған. Күҙәтеү палатаһы үҙ аллы эш алып бара, Башҡортостанда кеше хоҡуҡтары буйынса вәкил һәм төбәк йәмәғәт палатаһы менән тығыҙ хеҙмәттәшлек булдырылған.

 Мәжбүри тотоу урындарында кеше хоҡуҡтарын яҡлау буйынса йәмәғәт күҙәтеү комиссияһы – был урындарҙа кеше хоҡуҡтарын үтәүҙе контролләүсе йәмәғәт органы.

Фото: автор фотоһы.