Бер быуаттан ашыу тарихы бар

Ошо көндәрҙә Башҡортостан Журналистар союзының сираттан тыш XXIII съезы онлайн тәртибендә ойошторолдо. Һөйләшеүҙә дүрт мәсьәлә ҡаралды. Республика Журналистар союзы рәйесе, “Башҡортостан” гәзитенең баш мөхәррире, Башҡортостандың атҡаҙанған матбуғат һәм киң мәғлүмәт хеҙмәткәре Вәдүт Исхаҡов үткән йылдарҙағы эшкә йомғаҡ яһаны, бөгөнгө эшмәкәрлек тураһында һөйләне, киләсәккә уй-ниәттәре менән таныштырҙы.

Вәдүт Ғәйфулла улы сығышын һөйөнөслө хәбәр менән башланы. Сентябрь аҙаҡтарында Сочи ҡа­лаһында “Вся Россия-2022” тигән XXVI хәҙерге заман журналисти­каһы форумы үткән. Хәйер, был хаҡта мәғлүмәт биргәйнек инде. Унда Рәсәй Журналистар союзы рәйесе Владимир Соловьев, иле­беҙҙә иң эре һәм әүҙем ойошма­ларҙың береһе булараҡ, Башҡорт­остан Журналистар союзының эшмәкәрлегенә бик юғары баһа биргән. Әйткәндәй, иң сағыу исем туйы уҙғарған өсөн беҙҙе Диплом менән дә бүләкләгәндәр. Бынан тыш, 2021 йылғы йомғаҡтар буйын­са Журналистар союзы һөҙөмтәле эшмәкәрлеге өсөн Рәсәйҙең ТОП-3 исемлегенә ингән. Шул иғтибарға лайыҡ: рейтинг төҙөгәндә үткәрел­гән саралар, союзға ағза итеп алыныусылар, медиаәүҙемлек, сайтта һәм социаль селтәрҙә алып барыл­ған эштәрҙең барыһы ла иҫәпкә алынған. Әлбиттә, был – бер генә ке­шенең түгел, ғөмүмән, журна­лис­тарҙың берҙәм һәм уртаҡ хеҙмәте.

Вәдүт Исхаҡов әйтеүенсә, форумда журналистар дискуссия­ларҙа ҡатнашҡан, түңәрәк өҫтәл­дәрҙә фекер алышҡан, оҫталыҡ дәрестәрен тыңлаған, шулай уҡ күргәҙмәне ҡараған.

Форумда Башҡортостан һәм Донецк Журналистар союздары ара­һында Хеҙмәттәшлек тураһында килешеүгә ҡул ҡуйылған. “Аҡбуҙат” мәктәпкәсә йәштәге һәм башланғыс класс уҡыусылары әҙәби-нәфис журналын Өфөлә рус телендә баҫ­тырып, Донбасс балаларына бүләк иткәндәр.

Ике йыл һуҙымында Журналистар союзы ике күләмле сара ойош­торған, урындағы һәм зона кимә­лендә лә үткәрелгән. Мәҫәлән, 2021 йылдың яҙ айында Ғафури районында “Медиайыйын” уҙғарылған, быйыл шундай уҡ сара Өфө ҡалаһында “Торатау” конгресс-холында булған.

– Ҡәләм оҫталары журналистика өлкәһендәге заманса мультимедиа проекттарын үҫтереүгә грантҡа дәғүә итә ала, – тине Вәдүт Ғәй­фул­ла улы. – Был турала Ғафури районында уҙған медиайыйында Башҡортостан Башлығының киң мәғлүмәт саралары менән осрашыуында билдәле булды. Ошо аҡсаға сайтты яңыртырға мөмкин, шулай уҡ бүтән төрлө яңы программа йәки ижади проекттарҙы тәҡдим итергә була. Грантҡа тәжрибәле журналистар ҙа, йәштәр ҙә берҙәй өмөт итә ала.

Тупланған бай тәжрибәне йәш быуынға еткереү, йәштәрҙе эшкә өйрәтеү, ғөмүмән, алмаш әҙерләү – республикабыҙҙың Журналистар союзының мөҡәддәс бурыста­рының береһе. Ошо турала Вәдүт Исхаҡов былай тине:

– Яңы шарттарҙа беҙҙең Союз­дың иң мөһим йүнәлештәренең береһе – Башҡорт дәүләт универ­ситетының журналистика факультеты менән тығыҙ хеҙмәттәшлек булдырыу, ни тиһәң дә, тап бында киләсәк хәстәрләнә. Башҡортос­тандың Журналистар союзы ини­циативаһы менән, шул уҡ ваҡытта юғары уҡыу йортоноң журналистика факультеты деканаты ярҙа­мында, студенттар менән эшләү яйға һалынды. Тәүҙә йәш хәбәрсе­ләрҙең слеты уҙғарылды, “Баш­ҡорт­остан” һәм “Республика Башкортостан” республика гәзиттә­рен­дә ҡыҙ һәм егеттәр менән осра­шыуҙар уҙҙы. Өлкән быуын журналистары менән вуздың I курс студенттары араһында бәйләнеш­тәр булдырылды. 

ZOOM майҙансығында, йәш хәбәрселәрҙең республика фести­валенә ярашлы, республикабыҙҙың Журналистар союзы етәкселеге Башҡорт дәүләт университетының журналистика кафедраһы студенттары менән осрашҡан. Әйткәндәй, ошо сара университеттың башҡорт филологияһы, көнсығыш һәм журналистика факультеты кафедраһы ярҙамында ойошторолған. Баш­ҡорт­­остан Баш­лығы Радий Хәбировтың сығы­шынан өҙөк килтерәбеҙ. “Беҙ мот­лаҡ рәүештә хәл-торошто өйрәнә­сәкбеҙ һәм Башҡорт дәүләт университетында “журналистика” специальносы буйынса бюджет урындарын һаҡлау мәсьәләһен хәл итә­сәкбеҙ. Минеңсә, был осраҡта бюджет иҫәбенә белем алыу маҡ­сат­лы булырға тейеш. Уны тамамлау­сылар район гәзиттәрендә һәм муниципаль телеканалдарҙа эшләргә тейеш”, – тине Радий Фәрит улы. Һүҙ ҙә юҡ, бюджет урындары артҡан.

Вәдүт Ғәйфулла улы билдә­ләүенсә, Шәһит Хоҙайбирҙин исе­мендәге дәүләт премияһына иң-иңдәр лайыҡ була. Йыл да мәр­тәбәле конкурсты республика­быҙ­ҙың Матбуғат һәм киң мәғлүмәт саралары агентлығы менән бер­лектә Журналистар союзы үткә­рә. Ысынлап та, унда ҡатнашыусылар йылдан-йыл арта. Хөкүмәт кимә­лендә уҙған премияның күләме – 100 мең һум. Йыл һайын өр-яңы исемдәр менән танышыу – шатлыҡ­лы күренеш. Бөгөнгә Шәһит Хоҙай­бирҙин лауреаты тигән юғары исемде 128 журналист лайыҡлы рәүеш­тә йөрөтә. Төрлө йүнәлештәге мәҡәләләр конкурсҡа килә, илһөйәрлек темаһы – төп урында.

Журналистар, ижад итеүҙән айырмалы, төрлө йәмәғәт сараларында әүҙем ҡатнаша. Мәҫәлән, “Йәшел Башҡортостан” республика акцияһында ҡәләм оҫталары күп­ләп ағас ултырта. Башҡортостан Урман хужалығы министрлығы менән Журналистар союзы ара­һында үҙ-ара хеҙмәттәшлек тура­һында Килешеүгә ҡул ҡуйылған. Һуңғы йылдарҙа баш ҡалабыҙҙың Урмансылар паркында йәш үҫен­теләр ултыртыу изге йолаға әйлән­де. Хәҙер паркта Журналистар аллеяһы барлыҡҡа килде. 

Башҡортостан Журналистар союзы менән Өфө ҡалаһы ветерандар ойошмаһы араһында хеҙ­мәт­тәшлек тураһында Килешеүгә ҡул ҡуйылған. Ысынында, журналистар менән ветерандарҙы күп нәмә бәйләй. Беренсенән, Журналистар союзында бихисап өлкән йәштәгеләр ағза булып тора. Икенсенән, үҙ-ара хеҙмәттәшлек итеү күп мәсьәләне еңел һәм тиҙ хәл итеүгә көслө булышлыҡ итә.

2018 йылдан алып Журналистар союзы янында бөтә быуын өсөн журналистар клубы эшләй. Ул ябай ғына ойошма түгел, төрлө осра­шыуҙар ойошторола, улар үҙ-ара фекер алыша, тәжрибә уртаҡлаша.

Вәдүт Исхаҡов әйтеүенсә, рес­публикабыҙҙа Башҡортостан Баш­лығы Радий Хәбировтың башлан­ғысы менән, “Геройҙар уҙышы” федераль проектына ярашлы, “Патриот” паркында уҡытыу-методик үҙәге төҙөлгән. Ошонда илебеҙҙә беренсе тапҡыр киң мәғлүмәт саралары араһында “Медиагеройҙар уҙышы” уҙған. Бәйгелә 300 тирәһе журналист ҡатнашҡан. Бәйге тигәндән, йыл да күренекле диктор Әхәт Мортазиндың иҫтәлегенә “Һүҙ көсө” тип аталған волейбол ярышы үткәрелә, унда ҡатнашыусылар һаны йылдан-йыл арта.

Журналистарҙың “Журфест” республика фестивале шаулап-гөрләп уҙа, быйыл ул Ҡариҙел райо­нында ойошторолдо.

– Беҙҙә Союз ағзаларына матди ярҙам даими күрһәтелә, хатта ши­фаханаларға юлламалар тапшырыла, уны Рәсәй Журналистар союзы финанслай, – тине Вәдүт Ғәй­фулла улы. – Ҡыйыу һәм илһө­йәр журналистарҙың “ҡыҙыу нөктә­ләр­ҙә” эшләүе һәр йәһәттән дә маҡ­тау­ға лайыҡ. Әле лә Донбассҡа ко­мандировкаға юлланыусылар байтаҡ.

Башҡортостан Журналистар союзы ойошторған барлыҡ саралар ҙа “Журналист Башкортостана” гәзитендә яҡтыртыла.

Съезда республикабыҙҙың район-ара ижади ойошмаларының рәйестәре менән таныштырҙылар. Мәскәү ҡалаһында 27–29 октябрҙә Рәсәй Журналистар союзының XIII съезы ойоштороласаҡ, уға ун делегат һайланды.

Ошо көнгә хәтлем барыбыҙ ҙа Башҡортостан Журналистар сою­зы­ның барлыҡҡа килеү ваҡытын 1957 йыл тип белдек. Башҡорт­ос­тан Журналистар союзы менән республикабыҙҙың Милли архивы күп йылдар эҙләнеү һөҙөмтәһендә яңылыҡҡа тап булған. Баҡтиһәң, Башҡортостан Журналистар союзы 1921 йылдың 7 февралендә төҙөлгән.

- Илдар АҠЪЮЛОВ