Уларҙың да рәхәтләнеп йәшәгеһе килә

8-10 ноябрҙә Өфөнөң "Торатау" конгресс-холында I «Ҡаршылыҡтарҙы емереп» асыҡ форум-күргәҙмә ойошторола. Был Башҡортостанда үткәрелгән реабилитация индустрияһының иң күләмле йыйыны буласаҡ. Әлеге ваҡытта күргәҙмәлә ҡатнашыу өсөн илдең 12 төбәгенән – Мәскәү, Санкт-Петербург ҡалаларынан, Владимир, Ленинград, Мәскәү, Новосибирск, Һарытау, Свердловск, Силәбе өлкәләренән, шулай уҡ Краснодар, Приморье крайҙарынан, Башҡортостандан һәм Татарстандан 50-нән ашыу предприятие ғариза биргән.

«Ҡаршылыҡтарҙы емереп» тәүге асыҡ форум-күргәҙмәһе – ул Рәсәйҙең ете төбәгенән 70-тән ашыу спикер ҡатнашлығында киң мәсьәләләр даирәһе буйынса 30-ға яҡын һүҙ көрәштереү майҙансығы, түңәрәк өҫтәл, конференция һәм оҫталыҡ дәрестәре. 8 ноябрҙә Форумдың төп сараһы - «Сәләмәтлеге буйынса мөмкинлектәре сикләнгән кешеләрҙе реабилитациялау. Яңы саҡырыуҙар һәм ҡарарҙар», 10 ноябрҙә социаль эшҡыуарлыҡ буйынса төбәк-ара форум үтә.

8 ноябрҙә М.Ғафури исемендәге Башҡорт дәүләт академия драма театрында «Ҡаршылыҡтарҙы емереп» балалар ижады фестивале, ә 9-10 ноябрҙә конгресс-холда коммерцияға ҡарамаған ойошмаларҙың «Изге республика» уникаль тауарҙар һәм әйберҙәр йәрминкәһе уҙғарыла. Бынан тыш, «Әсә йөрәге» әсәләр советынан, “Ортомода” компанияһынан мода күрһәтеү һәм инклюзив коллективтар ҡатнашлығында концерт программаһы ҡаралған.

«Ҡаршылыҡтарҙы емереп» асыҡ форум-күргәҙмәһе – ул инвалидлыҡты реабилитациялау һәм иҫкәртеү, реабилитациялау техникаһы етештереүселәре һәм поставкалаусыларының үҙ-ара эш итеүен ойоштороуҙың көнүҙәк мәсьәләләрен тикшереү өсөн үҙенсәлекле майҙансыҡ.

Форумды ойоштороусылар – Башҡортостан Республикаһы Хөкүмәте, Яңы проекттарҙы ғәмәлгә ашырыу буйынса стратегик башланғыстар агентлығы, Ғаилә, хеҙмәт һәм халыҡты яҡлау министрлығы, “Ҡаршылыҡтарҙы емереп” социаль технологиялар үҙәге, “Социум+” халыҡты социаль хеҙмәтләндереү үҙәге, Президент гранттары фонды.

Башҡортостан Хөкүмәтенән хәбәр итеүҙәренсә, «Комплекслы реабилитация системаһын үҫтереү - бик сетерекле тема. Төбәктәрҙә бөгөн техник реабилитация сараларын етештереүселәр бар, перспективалы проекттар тормошҡа ашырыла. Беҙ уларға булышлыҡ итәбеҙ, даими бәйләнеш тотабыҙ, реабилитация өлкәһендә ниндәй проблемалар булыуын теркәйбеҙ. «Ҡаршылыҡтарҙы емереп» форумында беҙ уларҙы тикшереп, хәл итеү юлдарын тәҡдим итә, шулай уҡ Рәсәй телевидениеһы һәм радиоһы етештереүселәренә өҫтәмә ярҙам сараларын әҙерләй алырбыҙ, тип ышанам», - тигән Стратегик башланғыстар агентлығы башлығы Светлана Чупшева.

Рәсәйҙә инвалид булған 11 миллиондан ашыу кеше социаль, иҡтисади тормошҡа ҡушылырға теләй, тип өҫтәне ул. «Барыһы өсөн дә тигеҙ мөмкинлектәр биргән ҡаршылыҡһыҙ мөхит булдырыу - агентлыҡтың мөһим бурыстарының береһе, уны хәл итеүгә Стратегик башланғыстар агентлығы йәлеп иткән Милли социаль башланғыс йүнәлтелгән. Беҙ 67 төбәк, шул иҫәптән Башҡортостан менән әүҙем эшләйбеҙ», - тине Светлана Чупшева.

«Социаль интеграция, һаулыҡ мөмкинлектәре сикле кешеләрҙең белем һәм профессиональ үҫеше хәҙерге кешелек йәмғиәтенең мөһим бурыстарының береһе булып тора, шуға күрә Башҡортостанда инклюзив проекттарға киң ярҙам күрһәтелә. Бөгөнгә республикала 250 меңдән ашыу инвалид йәшәй. Уларға уңайлы булһын өсөн төбәктә өҫтөнлөклө объекттар һәм хеҙмәттәр менән ҡулланыу кимәлен күтәреү буйынса сараларҙы тормошҡа ашырабыҙ. Һуңғы биш йылда ошо маҡсатҡа 350 миллион һумдан ашыу аҡса йүнәлтелгән. Төбәктең дәүләт структуралары, хәйриә фондтары һәм йәмәғәт ойошмалары системалы нигеҙҙә сәләмәтлек мөмкинлектәре сикләнгән кешеләргә ярҙам итеүгә һәм уларҙың проблемаларына иғтибар йәлеп итеүгә йүнәлтелгән саралар уҙғара. «Ҡаршылыҡтарҙы емереп» форумы яңы ҡарарҙар ҡабул итеү өсөн яҡшы ҡорал булып торасаҡ», - тип хәбәр итте Башҡортостан Хөкүмәте Премьер-министры Андрей Назаров.

ЭШ ПРОГРАММАЛАРЫ
8 ноябрҙә Форумдың төп сараһы - «Сәләмәтлек мөмкинлектәре сикләнгән кешеләрҙе реабилитациялау. Яңы саҡырыуҙар һәм ҡарарҙар». Ултырыштың модераторы - Ленара Иванова, Башҡортостандың ғаилә, хеҙмәт һәм халыҡты социаль яҡлау министры. Спикерҙар: Рәсәйҙең хеҙмәт һәм халыҡты социаль яҡлау министры урынбаҫары Алексей Вовченко (Мәскәү ҡалаһы), Рәсәйҙең сәнәғәт һәм сауҙа министры урынбаҫары Гөлназ Ҡадирова (Мәскәү), «Социаль әһәмиәтле тәжрибәләрҙе үҫтереү һәм таратыу буйынса стратегик башланғыстар агентлығы» автономлы коммерцияға ҡарамаған ойошмаһының генераль директоры Светлана Чупшева (Мәскәү ҡалаһы), Башҡортостан Хөкүмәте Премьер-министры урынбаҫары - финанс министры Лира Игтисамова (Өфө), «Мәскәү социаль инновациялар үҫеше үҙәге» Бөтә Рәсәй инвалидтар йәмғиәте рәйесе Михаил Терентьев.

КҮРГӘҘМӘЛӘР ЭКСПОЗИЦИЯҺЫ
Әлеге ваҡытта Мәскәүҙән, Санкт-Петербургтан, Владимир, Ленинград өлкәһенән, Мәскәү өлкәһенән, Новосибирск, Һарытау, Свердловск, Силәбе өлкәләренән, Краснодар, Приморье крайынан һәм Башҡортостандан, Татарстандан 50-нән ашыу реабилитация саралары етештереүсе предприятие күргәҙмәлә ҡатнашыу теләген белдергән.

Фото www.sogornoesdk.ru