Беҙ фашизмға ҡаршы!

Бөгөн, 9 ноябрҙә Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһында Фашизмға, расизмға һәм антисемитизмға ҡаршы халыҡ-ара көнгә арналған асыҡ лекция үтте.

Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһы ректоры Данияр Мәүлийәр улы Абдрахманов лекцияны асып, Халыҡ-ара фашизмға, расизмға һәм антисемитизмға ҡаршы көн әлегә фашизмдың тамырын ҡорота алмау хаҡында иҫкәртеү булып тора, тип билдәләне. Әммә, милләтебеҙ, расабыҙ һәм динебеҙ ниндәй булыуға ҡарамаҫтан, бөтә кешеләрҙең дә хоҡуҡтары бер үк икәнен аңлаһаҡ, был хәлдәрҙе төҙәтеп була.

Лекцияны сәйәси фәндәр кандидаты, доцент, Башҡортостан Республикаһы Стратегик тикшеренеүҙәр институты директоры Владимир Леонидович Савичев үткәрҙе. Ул фашизм, расизм һәм антисемитизм идеологияһына юл ҡуймау һәм бындай идеологияның нимәгә килтереүе тураһында һөйләне. "Милләтселек һәм расизм фашизмы идеологияһы халҡыбыҙ өсөн сит. Беҙ бер-беребеҙҙе аңлап, үҙ-ара ихтирам итеп йәшәргә күнеккәнбеҙ. Күршеләребеҙ араһындағы тигеҙлекте, йылы мөнәсәбәтте юғары баһалайбыҙ. Был идеология ҡайҙалыр барлыҡҡа килһә, шунда уҡ уның Рәсәй халҡына сираттағы саҡырыу ташларлыҡ агрессив көс табыу ысулы эҙләнә икәне аңлашыла. Был идеология - беҙҙең мәҙәниәтте, ресурстарҙы тартып алыу ысулы!

Украинала милләтселектең дәүләт идеологияһына әйләнеүенә тыныс ҡарарға мөмкин ине, тип тә әйтәләр... Юҡ, был бит бер маҡсат менән генә эшләнгән: Рәсәй менән һуғышыр өсөн...

Нацизм һәм фашизмдың беҙгә ниндәй ҡайғылар алып килеүен оноторға ярамай, тарихты иҫләр кәрәк. Кем үҙ тарихын онотҡан, уны ҡабат хәтергә төшөрөргә мәжбүр була. Беҙ йәштәребеҙ нацизмдың нимә икәнен белмәһен өсөн барыһын да эшләргә тейешбеҙ", - тине ул.

9 ноябрь көнө осраҡлы ғына һайланмаған, тап 1938 йылдың 9 ноябренән 10-ына ҡарай төндә Германияла «Гәлсәр төн» булараҡ тарихҡа ингән фажиғәле ваҡиғалар булған бит. 

Бөгөн Рәсәй Федерацияһы Президенты Владимир Путиндың ҡаҙаныштары төрлө өлкәләрҙә яңы офоҡтар асыуын дауам итә, Рәсәйҙең бөгөнгө үҫешенә хеҙмәт итә, илебеҙҙең уңышлы киләсәгенә ҙур өлөш индерә, эшкә, бурысҡа тоғролоҡ, маҡсатҡа ынтылыш һәм ҡатмарлы ҡарарҙар ҡабул итә белеү өлгөһөн бирә. Ошо осорҙа илебеҙҙең яҙмышы хәл ителә, дәүләт башлығы ошондай ҡатмарлы заманда халыҡтарҙы берләштерә. 

Академия студенттары ла, был темаға битараф булмауҙарын белдереп, әүҙем сығыш яһаны. Александр Архипов, 3-сө курс студенты:

- Күп башлы фашизм һәм нацизм гидраһы йәнә башын күтәрә. Олатайым Бөйөк Ватан һуғышы йылдарында тылда эшләп фашизмға ҡаршы көрәшкән, ҡустымды Украинала фашизмға ҡаршы көрәшкә саҡырҙылар. XXI быуатта, яңы технологиялар, прогресс быуатында ла кешеләрҙе категорияларға, сорттарға һәм төрҙәргә бүлеүҙәренән ҡурҡыныс булып китә. Быға юл ҡуйырға ярамай! Бөтә донъяла ғына түгел, Рәсәй кеүек күп милләтле һәм күп мәҙәниәтле илдә лә фашизм сәскә атмаясаҡ!

Василий Горбунов, 3-сө курс студенты:

- Бөгөн, Халыҡ-ара фашизмға һәм милләтселеккә ҡаршы көрәш көнөндә, беҙ Бөйөк Ватан һуғышы геройҙарын, киләсәгебеҙ өсөн ғүмерҙәрен биргән атай-олатайҙарыбыҙҙы иҫкә алабыҙ. Әммә бөгөн неонацизм һәм неофашизм башын күтәрә, хәҙерге заман геройҙары ла - дуҫтарыбыҙ, туғандарыбыҙ һәм яҡындарыбыҙ еребеҙҙе фашизмдан ҡотҡарыу өсөн яңынан ҡулына ҡорал алды. Беҙ олатай-олатайҙарыбыҙҙың батырлыҡтарын бер ҡасан да онотмаясаҡбыҙ, айырыуса бөгөн Махсус хәрби операцияла ҡатнашыусыларҙың, беҙҙе еңелгән фашизмдан яҡлап, көн һайын күрһәткән батырлыҡтарын.

Ольга Ерусланова, 1-се курс студенты:

- Тыныслыҡ, бәхет, туғанлыҡ - был донъяла беҙгә бына нимә кәрәк, тип яҙған Марк Твен. Һәм ул, һис шикһеҙ, хаҡлы. Берләшкән осраҡта ғына кешелек үҫә һәм үҫешә аласаҡ. Беҙ барыбыҙ ҙа бер бөтөн, быны иҫтә тоторға кәрәк.